Ўзбекистон Республикаси Президентлигига номзодлар ва уларнинг сайловолди дастурининг асосий йўналишлари билан танишиб чиқинг
Янгиликлар
ТОШКЕНТ, 25 октябрь. /«Дунё» АА/. Туркий давлатлар ҳамкорлик кенгаши кузатувчилари миссияси аъзоси, Туркий кенгашнинг лойиҳалар бўйича директори Фаррух Жумаев «Дунё» АА мухбирига берган интервьюсида кеча, 24 октябрь куни ўтказилган Ўзбекистон Президенти сайлови ҳақидаги фикр-мулоҳазаларини бтлдирди.
- Миссиямиз 21 октябрь куни ўз ишини бошлади. Сайлов участкаларидаги тайёргарлик ишлари, сиёсий партиялардан Президентликка номзодларнинг дастурлари билан танишдик, партиялар вакиллари билан учрашдик, уларнинг тарғибот-ташвиқот ишлари учун берилган имкониятлар ҳақидаги фикрларини ўргандик.
Сайловни муносиб тарзда ўтказиш учун яратилган шарт-шароитларнинг гувоҳи бўлдик. Сайлов доирасидаги барча жараёнлар ошкора ва очиқ ўтказилди. Овоз бериш куни икки гуруҳга бўлинган ҳолда 30 та сайлов участкасида овоз бериш жараёнларини кузатиш имкониятига эга бўлдик.
Сайловчиларнинг кўтаринки кайфиятига, мамлакат ҳаётидаги муҳим сиёсий воқеада фаол иштирок этаётганига гувоҳ бўлдик. Мамлакат фуқароларининг 80 фоиздан ортиғи сайловда қатнашгани жуда юқори кўрсаткич ҳисобланади. Бу менинг назаримда, аҳоли ҳаёти яхшиланганидан, халқ ҳукумат ишидан қониқаётганидан далолат беради.
Мен туркий давлатлар ўртасидаги дўстона алоқаларни янада мустаҳкамлашга умид қиламан, биз дўстларимиз билан янги лойиҳаларни амалга оширишда ҳамкорликка тайёрмиз.
