Марказий сайлов комиссиясида барча беш партиядан кўрсатилган номзодлар Ўзбекистон Президентлигига номзод сифатида рўйхатга олинди

Йиғилиш давомида Ўзбекистон Халқ демократик партияси, Ўзбекистон Либерал-демократик партияси ва “Адолат” социал-демократик партиясидан Ўзбекистон Республикаси Президентлигига номзодлар рўйхатга олинди.

Шундай қилиб, айни пайтда беш сиёсий партия томонидан кўрсатилган қуйидаги номзодлар МСКда мамлакат Президенти лавозимига номзод сифатида рўйхатга олинди:

- Ўзбекистон “Миллий тикланиш” демократик партиясидан –  Қодиров Алишер Келдиевич;

- Ўзбекистон Экологик партиясидан – Обломурадов Нарзулло Наимович;

Ўзбекистон Халқ демократик партиясидан – Варисова Мақсуда Азизовна;

- Ўзбекистон Либерал-демократик партиясидан – Мирзиёев Шавкат Миромонович;

- «Адолат» Социал-демократик партиясидан – Абдуҳалимов Баҳром Абдураҳимович.

Шунингдек, мажлисда Ўзбекистон Республикаси Президенти сайловида халқаро ташкилотлардан қатнашадиган кузатувчиларни аккредитациядан ўтказиш масаласи ҳам кўриб чиқилди.

Ўзбекистон Республикаси Президенти сайловида халқаро ташкилотлардан қатнашадиган кузатувчиларни аккредитация қилиш тўғрисидаги МСК қарорига мувофиқ, Япония, Грузия, Россия ва Беларусдан 6 нафар хорижий кузатувчи рўйхатдан ўтказилди.

Комиссия аъзолари томонидан оммавий ахборот воситалари вакилларини аккредитациядан ўтказиш масаласи ҳам кўриб чиқилиб, Марказий сайлов комиссиясига келиб тушган 5 та маҳаллий оммавий ахборот воситасининг жами 23 нафар вакили аккредитациядан ўтказилди. Шундай қилиб, эндиликда аккредитациядан ўтказилган маҳаллий ва хорижий оммавий ахборот воситалари вакиллари жами 930 нафарни ташкил этмоқда.

Мажлис сўнгида кун тартибига киритилган масалалар юзасидан Марказий сайлов комиссиясининг тегишли қарорлари қабул қилинди.