САМАРҚАНД, 28 февраль. /«Дунё» АА/. Самарқанд ветеринария медицинаси институтида Витебск давлат ветеринария медицинаси академияси ректори Николай Гавриченко бошчилигидаги делегация билан учрашув ташкил этилди, деб хабар бермоқда «Дунё» АА мухбири.
Унда Самарқанд ветеринария медицинаси институти ҳамда Витебск Давлат ветеринария медицинаси академияси ҳамкорлигида ташкил этилган қўшма факультет фаолиятини янада ривожлантириш, факультет негизида янги, замон талаблари асосидаги қўшимча йўналишлар ташкил этиш, ҳамкорликда янги ўқув-қўлланмалар чоп этиш масалалари юзасидан фикр алмашилди.
Маълумот ўрнида, ўтган йилнинг август ойида таълим муассасалари ҳамкорлигида қўшма факультет ташкил этилганди. Ҳозирги кунда қўшма факультетда 30 нафар талаба ветеринария медицинаси ва ветеринария фармацевтикаси йўналишларида таҳсил олмоқда.
Келишувга биноан, талабалар таҳсилнинг дастлабки икки йилида Самарқанд ветеринария медицинаси институтида, кейинги икки йилда эса Витебск академиясида таҳсил олади.
Жорий йилнинг март ойида яна 15 нафар талабанинг Витебск академиясига ўқиш учун юборилиши режалаштирилган.
