ТОШКЕНТ, 9 март. /«Дунё» АА/. «Ўзсаноатқурилишбанк» билан «ICBC Standard Bank PLC» ўртасида 100 миллион долларлик эквивалентда кредит линиясини жалб қилиш учун заём битимини имзолади, деб хабар бермоқда «Дунё» АА мухбири банк ахборот хизмати манбасига таяниб.
Битим «Ўзсаноатқурилишбанк» томонидан кичик ва ўрта бизнес субъектлари лойиҳаларини миллий валютада молиялаштиришни янада кенгайтириш имконини беради.
«ICBC Standard Bank PLC» кредит линияси тадбиркорлик субъектларига ишлаб чиқариш ускуналарини янгилаш ва хомашё базасини тўлдиришга қаратилгани билан аҳамиятлидир.
– Ўзбекистон иқтисодиёти тез суръатларда ривожланмоқда, – дейди «ICBC Standard Bank PLC»нинг Россия ва Марказий Осиёдаги глобал бозорлар департаменти раҳбари Владимир Губер. – Мамлакат молиявий бозорини ривожлантиришда биз ҳам фаол иштирок этмоқдамиз. Ўзсаноатқурилишбанк билан ҳамкорлигимиз хусусида тўхталиб, бундан мамнунлигимизни ва мазкур муносабатлар янги молиявий маҳсулотлар яратиш устида давом этишини қайд этмоқчиман.
Таъкидлаш жоиз, «Ўзсаноатқурилишбанк» томонидан халқаро молия механизмларининг интеграция қилиниши, хусусан, «ICBC Standard Bank PLC»нинг жалб қилинадиган кредит линиялари банкнинг кичик ва ўрта бизнес сегментидаги ўрнини мустаҳкамлайди.
Маълумот ўрнида, ICBC Хитой банк гуруҳига кирувчи «ICBC Standard Bank PLC» Шанхай ва Гонконг фонд биржаларида листинги мавжуд бўлган дунёдаги йирик молиявий гуруҳлардан бири ҳисобланади. Дунёнинг 48 мамлакатида фаолият юритадиган ICBC 7 миллиондан зиёд корпоратив мижозларга ҳамда турли сотув каналлари орқали 600 миллиондан ортиқ хусусий мижозларга молиявий хизматлар тақдим этади.
