ПАР?Ж, 14 март. /«Дунё» АА/. Ўзбекистоннинг Франциядаги элчихонаси Жаҳон соғлиқни сақлаш ташкилоти янги корановирус турининг (COVID-19) дунёда тарқалиши пандемия ҳолатига келганини эълон қилгани муносабати билан ушбу мамлакатда истиқомат қилаётган юртдошларимизга мурожаат қилди, деб хабар бермоқда «Дунё»АА мухбири.
Мурожаатда Франция ҳукумати томонидан янги кўрсатма қабул қилингунига қадар жорий йилнинг 16 мартидан барча таълим даргоҳлари (боғчалар, мактаблар ва университетлар) ёпилиши маълум қилинган.
Шу муносабат билан, элчихона Францияда бўлиб турган фуқароларимиздан ўткир респиратор касаликка чалинганлар билан алоқада бўлишдан чекланиш, кўп одам йиғиладиган жойларга бормаслик ҳамда ён-атрофга диққатли ва огоҳ бўлишни сўраган. Бундан ташқари, Францияда қабул қилинган меъёрлар ва Жаҳон соғлиқни сақлаш ташкилоти тавсияларига қатъий амал қилиш таъкидланган.
Шунингдек, унда фуқароларга шахсий санитар-гигиена қоидаларига қатъий амал қилиш тавсия этилган. Жумладан, “таркибида спирт моддаси бўлган суюқлик воситалари ва совун билан қўлни мунтазам равишда ювиб туриш, жамоат жойларида масофани сақлаш, одамлардан камида 1 метр узоқликда туриш, айниқса уларда йўталиш, бурун оқиш ва юқори тана ҳарорати аломатлари аниқланганда, зудлик билан шифокорга мурожаат қилиш, имкон борича оғиз, бурун ва кўзни ушламаслик ўзингизнинг ва ён атрофдагиларнинг соғлигини сақлашга хизмат қилади”, дейилади мурожаатда.
Юқори тана ҳарорати, йўтал ва нафас олишнинг қийинлашиши ҳолатлари кузатилган тақдирда тезкор тиббий ёрдам 15 (SAMU 15) рақамига кўнғироқ қилиш тавсия этилган.
