ТОШКЕНТ, 1 май. /«Дунё» АА/. Юртимизда коронавирус инфекциясидан ҳоли бўлган ҳудудлар сафининг кенгайиб бораётгани эътиборга молик. Соғлиқни сақлаш вазирлигидан олинган маълумотларга кўра, мамлакатимизда ушбу касалликни енгиб ўтган беморлар сони 1 минг 186 нафарга етди, деб хабар бермоқда «Дунё» АА мухбири.
Жумладан, бугун Қашқадарё вилоятида даволанаётган сўнгги бемор бутунлай соғайди. Айни пайтга келиб вилоят коронавирус инфекциясидан бутунлай ҳоли ҳудудга айланди. Соғайган бемор 36 ёшда бўлиб, Чироқчи туманидан. У коронавирусга чалинган бемор билан мулоқотда бўлиб, ушбу инфекцияни юқтириб олган.
Бухоро вилоятида ҳам коронавирусга чалинган 25 нафар бемор тўлиқ дарддан фориғ бўлди. Улар вилоят соғлиқни сақлаш бошқармаси масъуллари иштирокида реабилитацияга кузатилди.
Шифо топганларнинг 22 нафари Россиядан, 1 нафар эса Туркиядан чартер рейс билан Бухорога олиб келинган. Уларда коронавирус инфекцияси тасдиқлангач, шифохонага жойлаштирилган. Қолган 2 нафари коронавирусга чалинганлар билан мулоқот орқали касалликни юқтириб олган.
Айни пайтда Тошкент тиббиёт академияси кўп тармоқли клиникасидан 16 нафар бемор буткул соғайгани учун Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Уларнинг 6 нафари Россия Федерациясидан Қозоғистон Республикаси орқали юртимизга келишган ва карантинга олинган. Касаллик аниқлангач, мазкур клиникага ётқизилган. 10 нафари эса коронавирус инфекциясига чалинганлар билан мулоқотда бўлиб, касалликни юқтириб олган.
Яна бир қувончли хабар Самарқанд вилоятидан олинди. Гап шундаки, бугун вилоятда 7 нафар юртдошимиз коронавирусдан соғайиб, соғ-саломат шифохонани тарк этди.
Шунингдек, 1 май куни Андижон шаҳридаги вилоят юқумли касалликлар шифохонасида коронавирус инфекциясига чалинган навбатдаги 4 нафар бемор буткул соғайди
