ТОШКЕНТ, 5 август. /«Дунё» АА/. Ўзбекистон Президенти «Республика ҳудудларида гулчилик ва кўчатчилик соҳаларини янада ривожлантириш тўғрисида»ги қарорни имзолади, деб хабар бермоқда «Дунё» АА мухбири.
Унда республика ҳудудларида гулчилик ва кўчатчиликни ривожлантириш, маҳаллий ва хорижий гул навларини парваришлаш, аҳоли ўртасида гулчилик санъати сир-асрорларини оммалаштириш, экспорт салоҳиятини янада мустаҳкамлаш вазифалари белгиланган.
Қарорга мувофиқ, гул етиштиришда аҳоли билан кооперация муносабатларини йўлга қўйиш, соҳа мутахассислари малакасини ошириш, ишлаб чиқариш жараёнларига илмий ишланмаларни жорий этишда тадбиркорларга ҳар томонлама кўмаклашиш мақсадида Ўзбекистонда Гул етиштирувчилар уюшмаси ташкил этилди.
Гул етиштирувчилар уюшмаси фаолиятини ташкил этиш учун Боғдорчилик ва иссиқхона хўжалигини ривожлантириш жамғармаси ҳисобидан 20 миллиард сўм миқдорида маблағ ажратилади.
Ҳужжатга мувофиқ, Наманган, Самарқанд вилоятлари ва Тошкент шаҳрида гул ҳамда кўчатларнинг йирик улгуржи бозори очилади.
Бундан ташқари, гул етиштиришга ихтисослашган кластерлар ва хўжаликларни қўллаб-қувватлаш ҳамда улар етишган гулларни экспортга чиқаришга кўмаклашиш мақсадида Қишлоқ хўжалиги вазирлиги ҳамда ?нвестициялар ва ташқи савдо вазирлигига қатор вазифалар юклатилди.
Унга кўра, ушбу вазирликлар тадбиркорлик субъектларини гулчилик ва кўчатчилик билан шуғулланишга қизиқтириш, уларни билим ва кўникмаларга эга бўлиши учун ўқитиш, шу жумладан, хорижий давлатларда ўқитиш, шунингдек, бу жараёнга хорижий мамлакатлардан малакали мутахассисларни жалб этиш ишларини бажаради.
Гулчилик соҳасига оид семинар, анжуман, ярмарка ва кўргазмалар ташкил қилиш, шунингдек, хорижий мамлакатларда ўтказиладиган ярмарка ва кўргазмаларда маҳалий гулчиларнинг иштирокини таъминлайди.
Давлатимиз раҳбарининг қарорига кўра, Андижон вилоятининг Андижон, ?збоскан ва Олтинкўл туманлари, Наманган вилоятининг Наманган ва Давлатобод туманлари ҳамда Жиззах вилоятининг Зомин ва Ғаллаорол туманлари гулчиликка ихтисослаштирилади.
Қишлоқ хўжалиги вазирлиги томонидан гулчиликка ихтисослашган ушбу туманларда тажриба тариқасида гулчилик соҳасида тажрибага эга бўлган тадбиркорлар иштирокида гулчилик кластерлари ташкил қилинади.
Гулчилик фаолияти билан шуғулланаётган тадбиркорлик субъектларининг ўз фаолиятларини кенгайтиришлари учун 0,06 гектардан 1 гектаргача ер майдонлари очиқ электрон танлов орқали 30 йилга деҳқон хўжалигини юритиш мақсадлари учун ер участкаларини ижарага бериш тартибида ажратилади.
«Ҳар бир оила – тадбиркор» дастури учун ажратиладиган маблағларнинг камида 10 фоизи гулчилик лойиҳаларини ташкил қилиш учун йўналтирилади.
Бундан ташқари «Темир дафтар», «Аёллар дафтари» ва «Ёшлар дафтари»га киритилган фуқароларга очиқ майдонда ҳамда иссиқхоналарда гул етиштириш бўйича агротехник тадбирларни ўргатиш учун ҳар бирининг майдони 2 сотих бўлган 25 та «Гулчилик ўқув полигон»ларини ташкил этиш учун 0,5 гектар ер майдони ташаббускор тадбиркорларга электрон онлайн тарзда берилиши назарда тутилмоқда.
Ҳужжатда 2023 йил 1 январгача туганаклар, пиёзбошлар, туганаксимон илдизлар, туганак пиёзлар, илдизпоя, жумладан, вегетатив тиним ҳолатидаги, вегетация ёки гуллаш давридаги сертармоқлари, бошқа тирик ўсимликлар (жумладан, илдизлари), қаламчалар ва пархиши импортида божхона божининг ноль ставкаси қўлланилилиши қайд этилган.
Қарорда ушбу соҳа учун малака замонавий кадрларни тайёрлаш, бунинг учун қуйидаги вазифалар белгиланган:
- 2022/2023 ўқув йилидан қишлоқ хўжалиги йўналишидаги олий таълим муассасаларида Гулчилик магистратура мутахассислиги бўйича кадрлар тайёрланади;
- 2022/2023 ўқув йилидан бошлаб Тошкент давлат аграр университетида Туркиянинг ?спарта амалий фанлар университети билан ҳамкорликда Манзарали боғдорчилик ва гулчилик соҳасида кадрлар тайёрлаш бўйича қўшма таълим дастурлари ишга туширилади;
Андижон вилояти Шаҳрихон тумани, Наманган вилояти Тўрақўрғон тумани ва Тошкент вилояти Зангиота туманидаги агротехнологиялар техникумларида ландшафт дизайни, гулчилик селекцияси ва кўчатчилик йўналишларида ўрта бўғин кадрларни тайёрлаш бўйича қисқа муддатли ўқув курслари ташкил қилинади. Тошкент вилоятида давлат-хусусий шериклик тамойиллари асосида Гулчиликка ўқитиш маркази фаолияти йўлга қўйилади.
Гулчиликка ўқитиш марказига Нидерландия, Туркия ва Таиланддан малакали мутахассисларни жалб этиш назарда тутилмоқда.
