ТОШКЕНТ, 23 декабрь. /«Дунё» АА/. Швейцариянинг МДҲ минтақаси-2020 мамлакатлари билан грантлар учун «Call for Seed Funding Grants with countries of the CIS Region 2020» танлови натижалари эълон қилинди, деб хабар бермоқда «Дунё» АА мухбири.
Ўзгидрометрология хизмати маълумотига кўра, якуний муҳокамалардан сўнг Швейцариянинг Қор кўчкиларини тадқиқ қилиш институти (WSL Institute for Snow and Avalanche Research SLF) ва Ўзбекистон Фанлар академияси Астрономия институтининг Ўзгидрометрология хизмати ҳамда Геология ва геофизика институти мутахассисларини жалб қилган ҳолда ишлаб чиққан «Турли вақтдаги радиолокацион сунъий йўлдош маълумотлари ва рақамли моделлаштириш ёрдамида Ўзбекистонда қор кўчкиси хавфини баҳолаш» лойиҳаси маъқулланди. Лойиҳа 2 йилга мўлжалланган.
Мазкур танлов МДҲ минтақаси билан Швейцариянинг илмий-техникавий ҳамкорлик маркази ҳисобланган Женева университети ташаббуси билан ўтказилди.
Танловга Швейцариянинг 16 та муассасаидан 7 та давлат билан ҳамкорликда турли хил илмий йўналишларда жами 31 та лойиҳа тақдим этилди. Танлов шартларига мувофиқ ушбу лойиҳаларнинг фақат учдан бир қисми молиялаштирилади. Лойиҳаларнинг якуний танлови бир нечта илмий мезонларга асосланади.
