ТОШКЕНТ, 3 февраль, /«Дунё»АА/. Бутунжаҳон сайёҳлик ташкилоти (UNWTO)нинг сўнгги маълумотларига кўра, Ўзбекистон туризм соҳаси энг жадал суръатларда ривожланаётган 20 мамлакат рўйхатидан ўрин олган, деб хабар бермоқда «Дунё» АА мухбири.
Жумладан, мамлакатимиз туризм соҳаси энг тезкор ривожланаётган давлатлар рўйхатида тўртинчи ўринда қайд этилган. Independent нашри шу ҳақидаги мақоласи билан бўлишди. Ушбу рўйхатда, шунингдек, Озарбойжон ҳамда Қозоғистон ҳам келтирилган бўлиб, улар 17- ва 20-ўринларни эгаллаган.
UNWTO статистика маълумотларига кўра, 2019 йил дунё бўйлаб хорижий сафарлар 1,5 миллиардга етган ҳамда бу кўрсаткич 2018 йилга нисбатан тўрт фоиз юқори бўлган. Франция 90 миллиондан зиёд сайёҳ ташриф буюрган мамлакат сифатида энг юқори натижани кўрсатган.
