ТОШКЕНТ, 15 октябрь. /«Дунё» АА/. Мамлакатимизнинг олий сиёсий лавозимига номзодлар сайловчилар билан учрашувлар ўтказишни давом эттирмоқда, деб хабар бермоқда “Дунё” АА мухбири.
Кеча Экологик партиядан давлат раҳбарлигига номзод Нарзулло Обломуродов Бухоро вилоятида, «Миллий тикланиш» демократик партиясидан Ўзбекистон Президентлигига номзод Алишер Қодиров Наманган вилоятида, «Адолат» социал-демократик партиясидан Ўзбекистон Президентлигига номзод Баҳром Абдуҳалимов Навоий вилоятида сайловчилар билан учрашди.
Бугун, 15 октябрь куни Экологик партиядан давлат раҳбарлигига номзод Нарзулло Обломуродов Навоий вилоятида, Халқ демократик партиясидан Ўзбекистон Президентлигига номзод Мақсуда Ворисова Тошкент вилоятида, «Адолат» социал-демократик партиясидан Ўзбекистон Президентлигига номзод Баҳром Абдуҳалимов Самарқанд вилоятида сайловчилар билан учрашади.
Учрашувлар чоғида номзодлар ўзларининг сайловолди дастурларини тақдим этмоқда, сайловчиларнинг саволларига жавоб бермоқда, уларни сайловда ҳамда мамлакатнинг келгусидаги тақдирини ҳал этиш жараёнида фаол қатнашишга даъват этмоқда.
