НЬЮ-ЙОРК, 20 июль. /“Дунё” АА/. “Ўзтўқимачиликсаноат” уюшмаси раисининг биринчи ўринбосари Мирмуҳсин Султонов бошчилигидаги бизнес-миссия вакиллари жорий йил 19-21 июль кунлари АҚШнинг Нью-Йорк шаҳрида бўлиб ўтаётган “Texworld USA” халқаро тўқимачилик саноати кўргазмасида иштирок этмоқда, деб хабар қилмоқда “Дунё” АА мухбири.
Ҳар йили икки марта ўтказиладиган ушбу кўргазма Осиё, Яқин Шарқ, Шимолий Америка ва дунёнинг бошқа минтақаларидаги ишлаб чиқарувчиларнинг кенг доираси билан бевосита учрашиш имконини беради.
Республикамиз вакиллари - "Yustex", "Xorazm Tex", “Milana textile”, "Samarkand Apparel", “Real textile”, “Hamza art textile”, "DAKA-INTEX", “Nil granit”, “Sulton textile”, “Forestcolor”, “Maroqand sifat”, “Gurlan Global Tex”, “Marjan Investment group”, “Parvoz Humo Ravnaq Trans” ва “Urban Hayot” компаниялари қарийб 140 м2 майдонда жойлашган “Made in Uzbekistаn” миллий стендида ўз маҳсулотларини намойиш этмоқда.
Кўргазманинг бу йилги дастурида газлама ва трикотаж, дастгоҳлар, калава иплар, тўқимачилик хизматлари, аксессуарлар ва тикув материаллари, уй тўқимачилик маҳсулотлари, тайёр маҳсулот, мебель матолари, рекламада қўлланиладиган тўқимачилик маҳсулотларидан ташкил топган тематик зоналар мавжуд.
