АНҚАРА, 23 сентябрь. /«Дунё» АА/. Ўзбекистон элчиси Алишер Аъзамхўжаев Туркия қишлоқ ва ўрмон хўжалиги вазири Бекир Пакдемирли билан учрашув ўтказди, деб хабар бермоқда «Дунё» АА мухбири.
Томонлар мамлакат иқтисодиёти ривожланиши ва аҳоли фаровонлигини таъминлашда агросаноат мажмуи улкан аҳамиятга эга эканини таъкидлади.
Ўзбекистон элчиси сўнгги йилларда мамлакатимизда қишлоқ хўжалигини ислоҳ қилиш, хусусан, соҳада давлат бошқаруви тизимини такомиллаштириш, бозор муносабатларини кенг жорий қилиш, қишлоқ хўжалиги маҳсулотларини етиштирувчи, қайта ишловчи ва экспорт қилувчи субъектлар ўртасидаги муносабатларнинг ҳуқуқий асосини мустаҳкамлаш, соҳага инвестициялар жалб қилиш борасидаги муайян ишлар ҳақида маълумот берди.
Бекир Пакдемирли Ўзбекистонда қишлоқ хўжалигини ривожлантириш бўйича амалга ошираётган изчил ислоҳатларни кузатиб бораётганини билдирди. Унинг айтишича, Туркия қишлоқ ва ўрмон хўжалиги вазирлиги Ўзбекистон билан ҳамкорликни кенгайтиришдан манфаатдор.
Туркия қишлоқ ва ўрмон хўжалиги вазири боғдорчилик, ўрмон ва иссиқхона хўжаликлари соҳаси мутахассислари учун Туркияда қисқа муддатли, шу жумладан, масофавий тренинглар ташкил этишга кўмак беришга тайёрлигини билдирди.
Учрашув натижасида вазир Бекир Пакдемирли бошчилигидаги Туркия қишлоқ ва ўрмон хўжалиги вазирлиги делегациясининг жорий йил ноябрь-декабрь ойларида Ўзбекистонга ташрифини ташкил этиш бўйича келишиб олинди.
