ТОШКЕНТ, 8 август. /«Дунё» АА/. Республика махсус комиссиясининг қарорига мувофиқ хориждаги Ўзбекистон фуқароларини Ватанга олиб келиш учун 2-16 август кунлари давомида амалга оширилиши белгиланган чартер рейсларнинг парвоз йўналишига қисман ўзгартириш киритилди, деб хабар бермоқда «Дунё» АА мухбири Ўзбекистон Республикаси Транспорт вазирлиги манбасига асосланиб.
Хусусан, 7 август куни Тошкент – Ростов Дон – Наманган, 8 август Тошкент – Санкт - Петербург – Наманган, 9 августга белгиланган Тошкент – Москва – Наманган авиақатновлари Тошкент шаҳрига амалга оширилади.
Шунингдек, Республика махсус комиссиясининг қарори билан Россия Федерациясининг Оренбург ва Самара вилоятларидаги Ўзбекистон фуқароларини Ватанга қайтариш учун 2 та поезд қатнови ташкил этилди.
Мазкур поездларнинг биринчиси 9 август куни Наманган шаҳрига, иккинчиси эса 9 август куни Самарқанд шаҳрига етиб келади. Поездларда олиб келинган барча фуқаролар ўрнатилган тартибда карантинга жойлаштирилади.
Россия Федерациясининг Ростов - Дон вилоятидаги фуқароларни олиб келиш мақсадида учинчи поезд қатнови ҳам ташкил этилди. Ушбу поезд 13 август куни Тошкент шаҳрига келади.