ТОШКЕНТ, 5 март. /«Дунё» АА/. «Ўзбеккино» миллий агентлиги маълумотига кўра, жорий йил 10-14 март кунлари Ёшлар ижод саройида «Ўзбеккино» МА ва Гёте институти ҳамкорлигида Овозсиз фильмлар фестивали ўтказилади, деб хабар бермоқда «Дунё» АА мухбири.
Мазкур фестивалда ўзбек ва немис киносининг овозсиз классик фильмларидан намуналар намойиш этилади. Фильмлар «Сафо» гуруҳининг жонли ижродаги мусиқалари жўрлигида ҳавола қилинади.
Фестивалнинг илк куни Гёте институтида “Республика кинофонди” ДУК директори Элжон Аббосов ва киношунос Нигора Каримова иштирокида «Кинолекторий» ҳужжатли медиа лойиҳасининг тақдимоти ўтказилади.
Фестиваль дастуридан "Ўлим минораси", "Шаҳзода Аҳмаднинг саргузаштлари" ва "Мохов" фильмлари ўрин олган.
Сеансларга кириш бепул.
