/"Dunyo" AA/. O'zbekiston Qurolli Kuchlari tashkil etilganining 32 yilligi hamda 14-yanvar - Vatan himoyachilari kuni munosabati bilan poytaxtimizda «Men G'olib» harbiy-vatanparvarlik ommaviy yugurish musobaqasi bo'lib o'tdi, deb xabar bermoqda "Dunyo" AA muxbiri.
«Humo Arena» sport majmuasining maydonchasidan 3 km va 10 km masofaga 1000 nafardan ortiq yuguruvchilar start oldi. Vatanparvarlik yugurish musobaqasida nafaqat mamlakatimiz qurolli kuchlari vakillari, kuch ishlatish tuzilmalarining xodimlari, harbiy o'quv muassasalarining kursantlari, balki professional sportchilar va havaskor yuguruvchilar ham ishtirok etishdi.
«Men G'olib» ommaviy yugurish musobaqasi an'anaviy tarzda yiliga ikki marta – O'zbekiston Qurolli Kuchlari tashkil topgan sana va Vatan himoyachilari kuni hamda Xotira va qadrlash kuni munosabati bilan o'tkaziladi.
Ilk marotaba 10 km masofaga yugurishda ishtirok etish uchun topshirilgan arizalar soni 3 km masofada yugurishga arizalar sonidan oshib, bu O'zbekistonda yugurishning tobora ommalashib borayotganidan va sog'lom turmush tarziga ongli ravishda yondashishdan dalolat beradi. Avlodlar o'rtasidagi aloqalarni rivojlantirish, yosh avlodni Vatan himoyachilari bayrami bilan tanishtirish maqsadida katta yoshdagi bolalar ota-onalari bilan birgalikda Men G'olib vatanparvarlik-yugurish musobaqasida 3 km masofaga yugurishdi.
Musobaqalar yakka tartibda va jamoaviy birinchiliklarda tashkil etildi.
Jamoaviy birinchilikda kuch ishlatish tuzilmalar idoralarining 7 ta jamoasi va o'quv ta'lim muassasalarining 6 ta jamoasi «Men G'olib» kubogi uchun kurashishdi. Ular orasida Mudofaa vazirligi, O'zbekiston Prezidenti Davlat xavfsizlik xizmati, Davlat xavfsizlik xizmati, Milliy gvardiya, Ichki ishlar vazirligi, Favqulodda vaziyatlar vazirligi, Davlat bojxona qo'mitasi vakillari ham bor edi. O'quv ta'lim muassasalarining jamoalari Qurolli kuchlar akademiyasi, Umumiy xavfsizlik universiteti, Ichki ishlar akademiyasi, FVV akademiyasi, Davlat xavfsizligi xizmati akademiyasi, Davlat Bojxona qo'mitasi institutining kursantlari orasidan shakllantirildi.
Yakunda «Men G'olib» jamoaviy musobaqalarida to'rtinchi marotaba O'zbekiston Mudofaa vazirligi jamoasi g'oliblikni qo'lga kiritdi.
