ТОШКЕНТ, 5 июнь. /«Дунё» АА/. Ўзбекистон Президенти «Халқаро меҳнат ташкилотининг Меҳнат хавфсизлиги ва гигиенасига кўмаклашиш асослари тўғрисидаги 187-сонли Конвенциясини (Женева, 2006 йил 15 июнь) ратификация қилиш ҳақида»ги қонунни имзолади, деб хабар бермоқда «Дунё» АА мухбири
Ушбу қонун парламент Қонунчилик палатасида халқ вакиллари томонидан шу йил 27 апрель куни қабул қилинган ва Олий Мажлис Сенатининг 28-29 май кунлари бўлиб ўтган ўн бешинчи ялпи мажлисида сенаторлар томонидан маъқулланган.
Конвенциянинг асосий мақсади – ишлаб чиқаришда жароҳат олиш, касб касалликларига чалиниш ва инсон ўлимининг олдини олиш учун меҳнат хавфсизлиги ва гигиенасини доимий равишда такомиллаштириб боришдир.
ХМТ Конвенцияси устувор конвенциялардан бири ҳисобланади, Конвенцияга мувофиқ миллий қонунчиликда иш берувчилар ва ишчиларнинг энг нуфузли ташкилотлари билан келишган ҳолда миллий сиёсат, миллий тизим ва миллий дастурни ишлаб чиқиш орқали касб касаллигига чалиниш, ишлаб чиқаришда жароҳат олиш ва инсон ўлимининг олдини олиш мақсадида меҳнат хавфсизлиги ва гигиенасини доимий такомиллаштиришга кўмаклашиш назарда тутилмоқда.
ХМТнинг 187-сонли Конвенциясини 49 та давлат, шу жумладан, қатор МДҲ мамлакатлари томонидан ратификация қилинган.
ХМТнинг 187-сонли Конвенцияси ратификация қилиниши меҳнат хавфсизлиги ва гигиенаси соҳасидаги халқаро стандартларни самарали татбиқ этишга кўмаклашишни, шунингдек, Ўзбекистоннинг меҳнаткашлар ҳуқуқларини таъминлаш бўйича асосий халқаро принциплар ва стандартларга содиқлигини кўрсатади.
