ТОШКЕНТ, 19 февраль. /«Дунё» АА/. Ўзбекистон Олий Мажлиси Сенати ва Россия Федерал Мажлиси Федерация Кенгаши ўртасида ўзаро ҳамкорлик бўйича парламентлараро комиссиянинг видеоконференцалоқа шаклида бешинчи мажлиси бўлиб ўтди, деб хабар бермоқда «Дунё» АА мухбири.
Парламентнинг юқори палатаси маълум қилишича, тадбирда Олий Мажлис Сенати Раисининг биринчи ўринбосари Содиқ Сафоев (комиссиянинг Ўзбекистон томонидан ҳамраиси), Россия Федерал Мажлиси Федерация Кенгаши Раисининг ўринбосари ?лёс Умаханов (комиссиянинг Россия томонидан ҳамраиси), комиссия аъзолари, Ўзбекистон ва Россия дипломатик идоралари раҳбарлари, шунингдек, вазирлик ва идоралар вакиллари иштирок этди.
Тадбирда икки давлат раҳбарлари мамлакатларимиз ва халқларимиз ўртасидаги ҳамкорликни кенгайтиришга катта аҳамият бераётгани таъкидланди. Жумладан, ўтган тўрт йил ичида Ўзбекистон Президенти Шавкат Мирзиёев ва Россия Президенти Владимир Путиннинг сиёсий иродаси ва қатъиятлиги туфайли Ўзбекистон-Россия стратегик ва иттифоқдош шериклигини ривожлантириш борасида янги босқичга эришилди.
Томонлар сўнгги вақтда Ўзбекистон ва Россия ўртасидаги парламентлараро мулоқот ҳам фаоллашганини қайд этди. Ўзбекистон Олий Мажлиси Сенати ва Россия Федерал Мажлиси Федерация Кенгаши ўртасидаги муваффақиятли ўзаро ҳамкорлик Ўзбекистон ва Россия мамлакатларининг кенг қамровли ҳамкорлиги, шу жумладан, нуфузли халқаро парламент тузилмалари доирасидаги ҳамкорликни янада ривожлантириш ва чуқурлаштиришга хизмат қилиши таъкидлаб ўтилди.
Қолаверса, меҳнат миграцияси соҳасидаги ҳамкорлик масалалари кўриб чиқилди. Томонлар асосий эътиборни ушбу соҳадаги долзарб муаммоларни биргаликда ҳал этишга ва келгусидаги ҳамкорлик режаларига қаратди.
Учрашув иштирокчилари Ўзбекистон Олий Мажлиси Сенати ва Россия Федерал Мажлиси Федерация Кенгаши ўртасида меҳнат миграцияси масалалари бўйича ҳамкорлик тўғрисидаги Меморандумни тайёрлаш ва имзолашга келишиб олди.
Тадбирда Россия томони иштирокчилари Ўзбекистон Россия учун азалий шерик ва иттифоқдош эканлигига урғу берлди. Сўнгги йилларда савдо-иқтисодий ҳамкорлик сифати ўзгарган. Бугунги кунда бу нафақат ўзаро маҳсулот етказиб бериш, балки юқори технологик лойиҳаларда намоён бўлмоқда.
Шунингдек, пандемия шароитида агросаноат комплекси соҳасида ўзаро ҳамкорлик қилиш масалалари ҳам муҳокама қилинди. Таъкидланганидек, 2020 йилда мамлакатлар ўртасидаги савдо айланмаси 2019 йилга нисбатан 1,5 баравар ошган. Маҳсулот етказиб бериш хавфсизлигини мустаҳкамлаш, логистикани такомиллаштириш бўйича ишлар олиб борилмоқда. Шу билан бирга, парламент аъзолари томчилатиб суғориш, узумчиликни ривожлантириш бўйича қўшма лойиҳалар масалаларини ҳам кўриб чиқди.
Тадбир иштирокчилари минтақалараро алоқаларни мустаҳкамлаш, туризмни ривожлантириш, шу жумладан, тўғридан-тўғри рейсларни қайта тиклаш, сайёҳлар алмашинувини кўпайтириш ва бошқа масалаларни муҳокама қилди.
Учрашувда Барқарор ривожланиш мақсадларига эришишда парламент аъзоларининг ролини ошириш, навбатдаги минтақалараро ҳамкорлик форумини ўтказиш масалалари кўриб чиқилди ҳамда Ўзбекистон Олий Мажлиси Сенати ва Россия Федерал Мажлиси Федерация Кенгаши ўртасида ўзаро ҳамкорлик бўйича парламентлараро комиссиянинг олтинчи мажлисининг кун тартиби тасдиқланди.
