ТОШКЕНТ, 18 февраль. / “Дунё” АА/. 18 февраль - Ўзбекистон ва Буюк Британия ўртасида дипломатик муносабатлар ўрнатилган кун. Буюк Британия 1991 йил 31 декабрь куни мамлакатимиз мустақиллигини тан олди. 1992 йилнинг февралида икки мамлакат Ташқи ишлар вазирликлари ўртасида ҳужжатлар алмашинуви бўлиб ўтди.
Сўнгги йилларда Ўзбекистон ва Буюк Британия муносабатларида янги ижобий тенденция кузатилиб, улар кўп қиррали ва истиқболли бўлиб бормоқда.
2007 йилдан 2019 йилгача Ўзбекистонга Буюк Британия ҳукумати, парламенти ва бошқа муассасалари аъзоларидан иборат 70 га яқин делегация ташриф буюрди. Ўзбекистон ва Буюк Британиянинг вакиллик органлари томонидан ўзаро ҳамкорлик бўйича гуруҳлар тузилган бўлиб, улар доирасида самарали ҳамкорлик амалга оширилмоқда.
Британия савдо таснифида Ўзбекистон "стратегик бозорлар" гуруҳига киритилган. 2019 йилда икки томонлама савдо ҳажми 193 миллион доллардан ошди, импорт ва экспорт кўрсаткичлари эса деярли тенг.
Фаол иқтисодий ҳамкорлик Ўзбекистонда фаолият юритаётган британиялик сармоядорлар сонидан ҳам далолат беради. Бугунги кунда республикамизда 400 дан ортиқ Британия иштирокидаги корхона мавжуд бўлиб, шундан 120 таси 100 фоиз Британия капитали билан тузилган. Ўзбекистон иқтисодиётида British-American Tabacco (тамаки ишлаб чиқариш), Worley Parsons (дизайн ва муҳандислик маркази), Rio Tinto (кончилик), IТЕ (кўргазма тадбирларини ташкил этиш ва ўтказиш) ва бошқалар етакчи мавқени эгаллаб турибди.
Савдо ва саноат бўйича Ўзбекистон-Британия Кенгаши самарали фаолият кўрсатмоқда. Унинг сўнгги 24-учрашуви ўтган йил 28 февраль-1 март кунлари Тошкентда бўлиб ўтган эди.
Бундан қарийб бир йил аввал, 14 февраль куни Лондон фонд биржасига 5 ва 10 йил муддатга Ўзбекистоннинг биринчи давлат халқаро облигациялари (Евробондлар) 1 миллиард АҚШ доллари миқдорида жойлаштирилди.
Ўзбекистон-Британия маданий-гуманитар алоқалари, жумладан, таълим соҳасида ҳам изчил ривожланмоқда.
2002 йилдан бошлаб Тошкентда халқаро Вестминстер университети фаолият кўрсатиб келмоқда. Ўзбекистон Миллий университети, Ўзбекистон Фанлар Академияси Кембриж университети билан биргаликда Тошкентда юқори технологиялар бўйича ўқув-тажриба маркази ташкил этди.
Ҳозирги кунда Ўзбекистонда хорижий тилларни ўрганиш тизимини такомиллаштириш ва маданият соҳасидаги ҳамкорликни ривожлантириш соҳасидаги ислоҳотларни қўллаб-қувватлашга қаратилган Британия Кенгаши вакиллигининг 2019-2020 йилларга мўлжалланган олтита лойиҳаси амалга оширилмоқда.
Бугунги кунда икки томонлама муносабатларнинг ҳуқуқий асослари 23 та ҳужжатдан иборат бўлиб, улардан 15 таси ҳукуматлараро ва 8 таси идоралараро мазмунга эга.
Сўнгги ҳужжатлардан бири 2019 йил 31 октябрь куни Тошкентда имзоланган Шериклик ва ҳамкорлик битими бўлиб, у Буюк Британиянинг Европа ?ттифоқидан чиқиши муносабати билан икки томонлама алоқаларнинг узлуксизлигини сақлаш, шунингдек, Буюк Британиянинг Ўзбекистон ва Е? ўртасидаги Шериклик ва ҳамкорлик битимидаги иштирокини тўхтатишни таъминлайди.
