ТОШКЕНТ, 13 февраль. /«Дунё» АА/. «Uzbekistan Airways» акциядорлик жамияти ходимлар либосларини ўзгартирди. Бу ҳақда компаниянинг “Telegram” каналида маълум қилинди, деб хабар бермоқда «Дунё» АА мухбири.
Учувчилар ва борт кузатувчилари 14 февралдан бошлаб янги либосларда ўз фаолиятини давом эттиради.
Кийимлардаги асосий ранг сифатида тўқ аквамарин ва терракота ранглари танланган.
Қизлар учун юбка, шим, уст кийимдан иборат икки хил рангли янги тўплам тақдим этилган. Костюмнинг астарлари терракота рангида бўлиб, компания логотипи тасвири туширилган. Шунингдек, бош кийим, матоли ва чарм қўлқоплар, соч турмаги учун матодан тикилган тасма, икки хил рангдаги бўйинбоғ-рўмолчалар ҳам айни тўпламдан жой олган. Кийимдаги безаклар шарқона услубда яратилган.
Эркак борт кузатувчилари учун тўплам тўқ кулрангдаги уч қисмли костюм кўринишида бўлиб, тўқ аквамарин безаклари бор. Бош кийим кумуш безакли тўқ кулрангда тақдим этилган.
Учувчилар учун кийимлар ўзгаришсиз қолган. Аммо компания бренди туширилган тугма ва эксклюзив бўйинбоғлар жорий этилган.
Хабарда айтилишича, матолар турли иқлим шароитини инобатга олган ҳолда танланган.
Лойиҳада маҳаллий ва хорижий экспертлар иштирок этгани айтилмоқда. Матоларни танлаш ва асосий тўпламнинг биринчи буюртмаларини тикиш Туркиянинг «Dress Best Uniforms» компанияси томонидан амалга оширилган.
