ТОШКЕНТ, 15 июнь. /«Дунё» АА/. Пойтахтимизда Шанхай ҳамкорлик ташкилотига аъзо давлатлар миллий координаторлари кенгашининг навбатдаги йиғилиши ўз ишини бошлади, деб хабар бермоқда «Дунё» АА мухбири.
Йиғилиш кун тартибига ташкилот фаолияти билан боғлиқ кенг қамровли масалалар киритилган. Делегациялар сентябрь ойида Душанбе шаҳрида ўтказилиши режалаштирилган ШҲТ саммитига тайёргарлик масалаларига алоҳида эътибор қаратади.
Шанхай Ҳамкорлик Ташкилотига аъзо давлатлар Миллий координаторлари кенгаши йиғилиши Шанхай Ҳамкорлик Ташкилоти ташкил этилганига 20 йил тўлган кунда бўлиб ўтмоқда.
Шу муносабат билан, бугун Тошкент шаҳрида жойлашган ШҲТ минтақавий аксилтеррор тузилмаси ?жроия қўмитасида ушбу санага бағишланган тантанали тадбир ташкил этилади.
Унда Ўзбекистон ҳукуматининг юқори мартабали вакиллари, миллий координаторлар ҳамда Тошкентда аккредитациядан ўтган дипломатия корпуси вакилларининг иштироки кўзда тутилган.
