“Dunyo” AA/. 13-oktabrdan eʼtiboran O‘zbekiston Respublikasi va Eron Islom Respublikasi Hukumatlari o‘rtasidagi ishbilarmon va ilmiy doiralar vakillari hamda sayyohlik guruhlar uchun viza jarayonlarini soddalashtirish to‘g‘risidagi Bitim kuchga kirdi, deb xabar bermoqda “Dunyo” AA muxbiri.
Ushbu Bitim Eron Islom Respublikasi Prezidentining 14-16 sentyabr kunlari O‘zbekistonga (Samarqand shahri) buyurgan rasmiy tashrifi doirasida imzolangan.
TIV Shartnoma-huquq departamenti maʼlumotiga ko‘ra, mazkur hujjat 11 moddadan iborat bo‘lib, uning kuchga kirishi ikki mamlakat o‘rtasidagi do‘stona munosabatlarni yana-da mustahkamlash, savdo-iqtisodiy, turizm, fan va ilmiy faoliyat sohalaridagi aloqalarni rivojlantirishga xizmat qiladi.
Hujjatda ikki davlat o‘rtasida bevosita sayyohlar almashuvini tashkil qilish, ishbilarmonlik va ilmiy sohadagi qo‘shma dastur va loyihalarni amalga oshirish bo‘yicha mushtarak kelishuv o‘z aksini topgan.
Mazkur hukumatlararo Bitimni amalga oshirish uchun O‘zbekiston tomonidan O‘zbekiston Respublikasi Tashqi ishlar vazirligi masʼul etib belgilangan.
