TOSHKENT, 22 dekabr. /"Dunyo" AA/. Markaziy saylov komissiyasining Xalqaro matbuot markazida brifing bo’lib o’tdi, unda O’zbekiston Respublikasi Markaziy saylov komissiyasi raisi Mirzo-Ulug’bek Abdusalomov so’zga chiqdi, deb xabar beradi «Dunyo» AA muxbiri.
U mahalliy va xorijiy jurnalistlar, xalqaro kuzatuvchilar va respublika jamoatchiligi vakillariga saylovda ovoz berish jarayoni qanday kechayotgani, Toshkent shahri va respublikamiz viloyatlaridagi saylov uchastkalarining faoliyati to’g’risida gapirib berdi.
Markaziy saylov komissiyasi rahbari O’zbekiston va mamlakatimizning xorijdagi diplomatik vakolatxonalari huzurida 10 260 dan ortiq saylov uchastkasi tashkil etilganini aytdi. Ayni paytda Yaponiya, Janubiy Koreya, Xitoy, Malayziya, Singapur, Indoneziya, Tailand, Hindiston, Markaziy Osiyo davlatlari va Rossiyaning sharqiy mintaqalarida ochilgan saylov uchastkalarida ovoz berish uchun ochilgan.
Ta'kidlandiki, tarixda birinchi marta beshta siyosiy partiya saylov jarayonida qatnashmoqda, parlament deputatligiga 744 nomzod ro’yxatga olingan. Saylovoldi tashviqoti jarayonida qo’pol qonunbuzarlik holatlari kuzatilmadi.
Respublikadagi 60 ta saylov uchastkasida 120 ta kamera o’rnatildi. Buning natijasida Markaziy saylov komissiyasining Xalqaro matbuot markazida hatto eng chekka hududlarda ham ovoz berish jarayonini onlayn tarzda kuzatish mumkin.
Xabar berilishicha, saylovni 40 dan ortiq mamlakatdan kelgan 825 nafar xalqaro kuzatuvchi va nufuzli xalqaro tashkilotlar vakillari kuzatmoqda. Fuqarolik jamiyati va siyosiy partiyalardan 70 ming kuzatuvchi ro’yxatga olingan.
Respublikada parlament saylovlari 100 ga yaqin xorijiy jurnalistlar, shuningdek, 800 dan ortiq mahalliy ommaviy axborot vositalari xodimlari tomonidan yoritilmoqda.
M.Abdusalomovning ta'kidlashicha, saylov komissiyalari tarkibining 50 foizini ayollar tashkil etgan.
O’zbekiston Respublikasida ovoz berish soat 20.00 gacha davom etadi.
