ТОШКЕНТ, 24 январь. /"Дунё" АА/. ЕХҲТнинг Ўзбекистондаги лойиҳалари мувофиқлаштирувчиси Жон МакГрегор “Дунё” АА мухбирига берган интервьюсида Ўзбекистон Республикаси Президенти Шавкат Мирзиёевнинг Олий Мажлисга йўллаган Мурожаатномаси ҳақида фикр билдирди.
– Президент ўз Мурожаатномасида халқаро ҳамжамият, шу жумладан, ЕХҲТнинг Олий Мажлис Қонунчилик палатаси, халқ депутатлари вилоят, туман ва шаҳар Кенгашларига сайловларни кузатиш борасидаги саъй-ҳаракатларини эътироф этишдан бошлади.
Таъкидлаш керакки, ЕХҲТ илк бор таркибида 300 дан ортиқ экспертлар бўлган мониторинг ўтказди. Бундан ташқари, 800 дан ортиқ халқаро кузатувчининг иштироки ҳам катта кўрсаткичдир. Мониторинг жараёнида қатнашган ҳар бир кузатувчи Ўзбекистоннинг келгусида ривожланишига кўмаклашиш истагида фаолият юритди.
Шу билан бирга, Президентнинг қонун устуворлиги ҳақидаги фикрларини мамнуният билан қайд этишни истардим. Давлат раҳбари таъкидлаганидек, суд залига кирган киши адолат руҳини ҳис қилиши керак. Бу қонунлар ва адолатни ҳимоя қилишда ифодаланган жуда кучли сўзлар. Шунингдек, у қонун устуворлигисиз одамлар турмуш даражасини яхшилаш имконини берадиган кучли иқтисодиётни таъминлаш қийинлигини таъкидлади.
Ўзбекистон Президентининг коррупцияга қарши кураш бўйича қарашларига алоҳида тўхталмоқчиман. Бу, ўз навбатида, ЕХҲТ дунё бўйлаб фаолиятининг ажралмас қисми ҳамдир.
Ҳа, коррупция бизнесга халақит беради, самарали бошқарув ривожланишига тўсиқ бўлади, жамиятни барбод қилади. Шу боис ҳар биримиз коррупцияни йўқ қилишга ҳаракат қилишимиз, коррупция ҳолатига йўл қўйиб бўлмайдиган жамият қуришимиз керак. ЕХҲТ ушбу йўналишда Ўзбекистонни қўллаб-қувватлаш учун қатор лойиҳаларни амалга оширишда давом этади.
