TOSHKENT, 21 iyul. /«Dunyo» AA/. 2019-yilning 19-iyul kuni Toshkent shahrida konsullik masalalari bo‘yicha O‘zbekiston – Gruziya tashqi ishlar vazirliklari o‘rtasidagi maslahatlashuvlarning birinchi raundi bo‘lib o‘tdi, deb xabar qilmoqda O'zbekiston Respublikasi Tashqi ishlar vazirligi ma'lumotiga tayanib “Dunyo” axborot agentligi.
Maslahatlashuvlarda ishtirok etish uchun Gruziya Tashqi ishlar vazirligi Konsullik departamenti direktori Georgiy Tabatadze boshchiligidagi delegatsiya O‘zbekistonga keldi.
Maslahatlashuvlar chog‘ida konsullik sohasidagi ikki tomonlama munosabatlarning hozirgi holati va istiqbollari hamda ikki mamlakat huquq-tartibоt organlari o‘rtasidagi hamkorlikni kengaytirish masalalari muhokama qilindi.
Migratsiya sohasidagi hamkorlik, fuqarolik, oilaviy va jinoiy ishlar bo‘yicha huquqiy yordam ko‘rsatishga alohida e’tibor qaratildi. Elektron vizalarni berish, identifikatsiya kartochkalarini rasmiylashtirish jabhalarida, konsullik sohasiga zamonaviy texnologiyalarni joriy qilish va Faxriy konsul institutidan foydalanish masalalari borasida ham tajriba almashildi.
Muzokaralar yakunida Konsullik maslahatlashuvlari bayonnomasi imzolandi. Hujjat konsullik-huquqiy sohasida erishgan kelishuvlarini ikki mamlakatning manfaatdor vazirlik va idoralar tomonidan bajarilishini tartibga soladi.
