ТОШКЕНТ, 7 март. /«Дунё»АА/. Ўзбекистон Республикаси Соғлиқни сақлаш вазирлиги ҳузуридаги Санитария-эпидемиологик осойишталик агентлиги томонидан олинган расмий маълумотларга кўра, 7 март соат 09:00 гача дунёнинг 101 давлатида жами 102 минг 180 кишида “COVID-19” коронавирус инфекцияси аниқланган, улардан 57 минг 389 нафари соғайган, 3491 нафари вафот этган. ?нфекция дунёнинг 101 давлатида 21 минг 529 ҳолатда қайд этилган. Касалликнинг бир суткада ўсиши Хитойда 141 нафар (0,19 фоиз), бошқа давлатларда 5058 нафарни (23,4 фоиз) ташкил қилган.
Ўзбекистон Республикасида 2020 йил 7 март соат 09:00 гача “COVID-19” коронавирус инфекцияси қайд этилмади.
Жорий йилнинг 15 январидан 6 мартигача бўлган даврда Хитой Халқ Республикаси ва 29 февраль кунидан эпидемик вазият нохуш бўлган давлатлардан Ўзбекистонга 6311 фуқаро келган (1132 нафари Хитой ва Корея фуқаролари). 1410 нафарининг саломатлиги тиббий кузатувга олинган.
6 март куни Тошкент халқаро аэропорти орқали хорижий давлатлардан 25 та рейсда келган 4113, темир йўллар орқали 5 та поездда келган 609 фуқаро, давлат чегара божхона постлари орқали 1882 автотранспорт эгалари ва 37 минг 730 йўловчи санитария карантин пунктлари термометриясидан ўтказилган. Улар орасида охирги 15 кун ичида коронавирус тарқалган давлатларда бўлган 303 киши рўйхатга олинган. Жанубий Кореядан келган ўзбекистонлик талабанинг тана ҳарорати меъёрдан юқори бўлгани аниқланган. У Вирусология илмий текшириш институти клиникасига ётқизилган, лаборатория усулида текширилганда коронавирус инфекцияси аниқланмади.
Жидда шаҳридан HY 3612 рейси билан эрталаб соат 6:30 да 244 нафар Умра зиёратчилари Тошкентга учиб келди. Улар 2 маротаба термометрия ва инфекционист кўригидан ўтказилди, рўйхати тузилиб маъмурий ҳудудларга тиббий кўрикни давом эттириш учун юборилди ва назоратга олинди.
Мамлакатимиз аҳолиси ўртасида коронавирус инфекцияси бўйича эпидемиологик барқарорликни таъминлашга йўналтирилган барча профилактик ва эпидемияга қарши тадбирлар Соғлиқни сақлаш вазирлиги ҳузуридаги Санитария-эпидемиологик осойишталик агентлиги томонидан халқаро тиббий санитария қоидалар талаблари асосида амалга оширилмоқда. Мазкур тадбирларда мутасадди вазирликлар, идоралар ва кенг жамоатчилик фаол иштирок этмоқда.
Эслатиб ўтамиз, касалликни олдини олиш учун ҳар-бир фуқаро қуйидаги тавсияларга амал қилиш керак:
– аввало чет элга боришни режалаштиришда дунёдаги эпидемик вазият бўйича тўлиқ маълумотлардан хабардор бўлинг.
– зарурат бўлмаган тақдирда оммавий тадбирларда иштирок этишдан имкон қадар чекланинг.
– қўлларни тез-тез, яхшилаб совун билан ювинг ва спиртли дезинфекцияловчи воситалардан фойдаланинг.
– фарзандларингизнинг қўл ювишини доимий назоратга олинг.
– юз-кўзингизни нотоза қўл билан ушламанг.
– уй ҳайвонларини боқишда, асрашда гигиена қоидаларига қатъий риоя қилинг.
– одамлар олдида йўталганингизда ёки аксирганингизда оғзингиз ва бурнингизни дастрўмол, салфетка ёки букилган тирсагингиз билан тўсинг.
– шамоллаш ёки грипп аломатлари бор одамлар билан яқин, юзма-юз мулоқот қилишдан чекланинг.
– овқатланишда яхшилаб пиширилган, асосан қайнатилган ва қовурилган таомлардан истеъмол қилинг, истеъмол қилинаётган гўшт ва сут маҳсулотларининг яхшилаб пишганлигига ишонч ҳосил қилинг.
– иситма, йўтал ва нафас қисиши ҳолатлари пайдо бўлганда дарҳол шифокорга мурожаат қилинг.
Агарда сизда COVID-19 коронавирус инфекцияси ва у билан боғлиқ вазият юзасидан қўшимча савол бўлса Санитария-эпидемиологик осойишталик агентлигининг 71 276-49-66 телефон рақамига мурожаат қилишингиз мумкин.
Санитария-эпидемиологик осойишталик агентлиги
Жамоатчилик билан алоқалар бўлими
