СEУЛ, 14 май. /«Дунё» АА/. Корея Республикасининг Корё университети профессори Цой Чжэ Ук жорий йил март ойида коронавирус тарқалишига қарши курашда маҳаллий мутахассисларга ёрдам бериш учун Ўзбекистонга таклиф қилинганди.
Мутахассис ватанига қайтиб келгач, Жанубий Кореянинг «The Korea Herald» нашрига берган интервьюсида ўзбекистонлик ҳамкасблари билан ишлаш тажрибаси ҳақида сўзлаб берди.
Нашрда қайд этилишича, Цой Чжэ Ук етакчи тадқиқотчи сифатида Тошкент тиббиёт академиясида 2016 йилдан 2018 йилгача атроф-муҳит ва инсон саломатлиги бўйича махсус ўқув курсини ташкил этишга ёрдам берган.
Ўзбекистонда коронавирус билан илк зарарланиш ҳолати аниқлангач, мамлакатимиз вакиллари у билан боғланиб, кўмак кўрсатишини сўраб уни Ўзбекистонга таклиф қилишган.
Корё университети профессори ўз интервьюсида унинг вазифаси соғлиқни сақлаш идораларига касалликларни назорат қилиш бўйича кўрсатмалар, эпидемиологик текширув баённомалари ва бошқа ҳаракатлар режалари ҳамда стратегияларини ишлаб чиқишда маслаҳат бериш эканини қайд этди. У, шунингдек, ҳукумат вакиллари, касалликларни назорат қилиш агентликлари ва инфекция юқтирган беморларни даволашда қатнашаётган тиббиёт ходимлари иштирокидаги видеоконференцияларда ҳамда миллий телевидение орқали ўтказилган онлайн-брифингларда ҳам иштирок этгани ҳақида маълумот берди.
"Менинг иш соатим кунига 10-11 соат, ҳафтасида эса 6-7 кун эди. Ўзбекистонда бўлиш муддатим дастлаб икки ҳафтага режалаштирилган эди. Аммо яна икки ҳафтага узайтирилди”, дейди Цой Чжэ Ук.
Кореялик профессор таъкидлаганидек, Ўзбекистон эндемик касалликларга қарши курашда катта тажрибага эга бўлса-да, COVID-19 сўнгги йилларда мамлакатда кенг тарқалган юқумли касаллик сифатида қайд этилади.
"Жанубий Корея эса, ўз навбатида, чўчқа гриппи (H1N1) ва “MERS” каби жиддий ўткир респиратор синдромлари офатларини бошдан кечиришига тўғри келган", дейди у.
Ушбу касалликка қарши курашда мамлакатимиз томонидан кўрилаётган чора-тадбирлар ҳақида гапирганда, Корё университети профессори чегараларда қатъий назорат ва карантин тартибларининг ўрнатилгани ушбу касаллик кенг тарқалиши олдини олишнинг муваффақият калити бўлганини қайд этди.
“Ўзбекистон ҳукумати тезкор жавоб чораларини кўриш учун махсус комиссия тузиш орқали идора усулидаги етакчилигини намойиш этди. Махсус комиссия қисқа фурсатларда ишга киришиб, зарур чораларни амалга оширди. "Биринчидан, мамлакатда чегаралар орқали ўтишда чекловлар жорий қилинди, махсус карантин ва даволаш муассасалари бунёд этилди, ушбу тиббий тузилмалар интенсив муолажа имконини берувчи зарур ускуналар билан таъминланди. Бу борадаги ишларни самарали ташкил қилиш учун керакли маблағ йўналтирилди. Яна бир жиҳат, ана шундай қийин шароитга қарамасдан Ўзбекистон қўшни давлатларга ҳам кўмак кўрсатди. Соғлиқни сақлаш соҳасидаги инқирозни енгишда ёрдам беришни ўз бурчи, деб билди", дея интервьюга якун ясайди Цой Чжэ Ук.
