ТОШКЕНТ, 30 август. /«Дунё» АА/. Бугун Марказий сайлов комиссиясининг навбатдаги йиғилиши бўлиб ўтди, деб хабар бермоқда «Дунё» АА мухбири Марказий сайлов комиссияси Матбуот хизматининг маълумотига таянган ҳолда.
Мажлисни Комиссия раиси З.Низамходжаев бошқарди.
Тадбирда Сиёсий партиялар томонидан тақдим этилган имзо варақаларининг тўғри тўлдирилганлигини текширувчи Эксперт гуруҳларини тузиш, Ўзбекистон Республикаси Президенти сайловида халқаро ташкилотлардан қатнашадиган кузатувчилар ва оммавий ахборот воситалари вакилларини аккредитациядан ўтказиш, Ўзбекистон Республикаси Олий Мажлиси Сенати аъзолари рўйхатидан чиқариш билан боғлиқ масалалар кўриб чиқилди.
Марказий сайлов комиссияси аъзолари мажлис кун тартибидаги биринчи масала – Сиёсий партиялар томонидан тақдим этилган имзо варақаларининг тўғри тўлдирилганлигини текширувчи Эксперт гуруҳларини тузиш масаласини кўриб чиқди.
Таъкидлаш жоизки, Сайлов кодексининг 39-моддасига биноан, сиёсий партиялар тақдим этган имзо варақаларининг тўғри тўлдирилганлиги Марказий сайлов комиссияси томонидан беш кунлик муддатда текширилади. Сайловчилар имзолари зарур сонининг камида ўн беш фоизи ва имзо варақаларига имзоларини қўйган сайловчилар тўғрисидаги тегишли маълумотлар текширилиши лозим.
Марказий сайлов комиссияси имзо варақалари тўғри тўлдирилганлигини текширувчи Эксперт гуруҳини тузиши мумкин. Эксперт гуруҳи таркибига ички ишлар ва адлия органларининг мутахассислари, шунингдек, фуқаролик жамияти институтлари вакиллари жалб этилади. ?мзо варақаларини текширишда сиёсий партияларнинг ваколатли вакиллари иштирок этади.
Шунингдек, мажлисда Президенти сайловида халқаро ташкилотлардан қатнашадиган кузатувчиларни аккредитациядан ўтказиш масаласи кўриб чиқилди.
Қайд этилганидек, Сайлов кодексининг 33-моддасига мувофиқ, сиёсий партиялардан, фуқароларнинг ўзини ўзи бошқариш органларидан, шунингдек, бошқа давлатлар ва халқаро ташкилотлардан кузатувчилар ўз фаолиятини тегишли комиссиялар томонидан берилган мандатлар асосида амалга оширади. Манфаатдор ташкилотлар ўз кузатувчилари тўғрисида сайлов комиссияларига сайловдан камида ўн кун олдин ариза билан маълум қилади.
Манфаатдор ташкилотдан ариза олинганидан кейин беш кун ичида сайлов комиссияси кузатувчи учун мандат беради. Бошқа давлатлардан, халқаро ташкилотлардан кузатувчиларга мандатлар Марказий сайлов комиссияси томонидан берилади. Мажлисда Ўзбекистон Президенти сайловида халқаро ташкилотлардан қатнашадиган кузатувчиларни аккредитация қилиш тўғрисидаги МСК қарорига мувофиқ, ЕХҲТ Д??ҲБдан 3 нафар халқаро кузатувчи рўйхатдан ўтказилди.
Шунингдек, мажлисда оммавий ахборот воситалари вакилларини аккредитациядан ўтказиш тўғрисидаги МСК қарорига мувофиқ, 36 нафар маҳаллий ОАВ вакили рўйхатдан ўтказилди. Қайд этиш жоиз, шу кунга қадар аккредитациядан ўтказилган маҳаллий ОАВ вакиллари сони 766 нафар, хорижий ОАВ вакиллари сони 48 нафарни ташкил этмоқда.
Мажлис давомида Т.Холдаровни Ўзбекистон Республикаси Олий Мажлиси Сенати аъзолари рўйхатидан чиқариш тўғрисидаги қарор лойиҳаси кўриб чиқилди. МСК қарорига биноан, Топиболди Холдаров вафоти сабабли Олий Мажлис Сенати аъзолари рўйхатидан чиқарилди.
Мажлис сўнггида кун тартибига киритилган масалалар юзасидан Марказий сайлов комиссиясининг тегишли қарорлари қабул қилинди.
