ТОШКЕНТ, 10 декабрь. /«Дунё» АА/. Ўзбекистон ташқи ишлар вазири ўринбосари Шерзод Асадов бошчилигидаги делегация Марказий Осиё ва Афғонистон ташқи ишлар вазирлари ўринбосарларининг видеоконференция шаклидаги йиллик учрашувида иштирок этди. Тадбир БМТнинг Марказий Осиёда превентив дипломатия бўйича минтақавий маркази томонидан ташкил қилинди, деб хабар қилмоқда “Дунё” АА мухбири.
Т?В маълумотига кўра, тадбирда БМТ Бош котибининг сиёсий масалалар бўйича ёрдамчиси Мирослав Енча, БМТ Бош котибининг Марказий Осиё бўйича махсус вакили/Марказий Осиёда превентив дипломатия бўйича минтақавий маркази раҳбари Наталья Герман, БМТ Бош котибининг махсус вакили/БМТнинг Афғонистондаги ёрдам миссияси раҳбари Дебора Лайонс, шунингдек Қозоғистон, Қирғизистон, Тожикистон, Туркманистон ва Афғонистон ташқи ишлар вазирлари ўринбосарлари қатнашди.
Томонлар минтақавий сиёсат ва хавфсизликнинг долзарб масалалари, Марказий Осиё давлатлари ҳамда Афғонистон ўртасидаги ўзаро муносабатларнинг ҳолати ва истиқболларини кўриб чиқди.
Марказий Осиёда превентив дипломатия бўйича минтақавий марказ фаолияти, минтақа давлатларининг ушбу тузилма билан ҳамкорлиги, эришилган натижалар ҳамда 2021 йилга мўлжалланган режалари тўғрисида фикр алмашилди.
Ўзбекистон ташқи ишлар вазири ўринбосари иштирокчиларга Президент Шавкат Мирзиёевнинг минтақада ҳамкорликни ҳар томонлама мустаҳкамлаш борасидаги ташаббуслари, хусусан, бу борада алоҳида аҳамиятга эга бўлган Марказий Осиё мамлакатлари давлат раҳбарлари Маслаҳат учрашуви ҳақида маълумот берди. Минтақавий муҳим масалаларни ҳал қилишда эришилган ютуқлар, жумладан, чегараларни қонуний тарафдан мустаҳкамлаш, транспорт коммуникацияларидан биргаликда фойдаланиш ва ўзаро манфаатли соҳаларда ҳамкорлик кўламини ошириш муҳимлиги қайд этилди.
Афғонистон билан алоқаларни кенгайтириш, афғонлараро тинчлик музокараларини давом эттириш ва қўшни мамлакатни ижтимоий-иқтисодий тиклашга ёрдам бериш бўйича Ўзбекистон томонидан олиб борилаётган ишларга алоҳида эътибор қаратилди.
Ўзбекистон делегацияси 2021 йилда Тошкентда Бирлашган Миллатлар Ташкилотининг Глобал антитеррор стратегияси минтақавий Қўшма режасининг 10 йиллик натижалари ва келгуси истиқболларига бағишланган халқаро конференцияни ўтказиш бўйича тақдимот уюштирди.
Тадбирда кун тартибидаги бошқа минтақавий масалалар муҳокама қилинди.
