КУАЛА ЛУМПУР, 12 август. /«Дунё» АА/. Ўзбекистон Президенти томонидан кеча имзоланган «Ватандошлар» жамоат фондини ташкил этиш тўғрисидаги қарор Малайзияда истиқомат қиладиган ватандошларимиз томонидан ҳам мамнуният билан кутиб олинди, деб хабар бермоқда «Дунё» АА мухбири.
Абдулазиз Багиев, Ўзбекистон Республикаси фуқароси, Малайзиянинг “PETRONAS” компанияси ходими:
- Ўзбекистонда кечаётган жараёнларни мунтазам кузатиб бораман. Юртимизда барча соҳаларда амалга оширилаётган кенг кўламли ислоҳотлар натижаси ўлароқ улкан ижобий ўзгаришлар рўй бераётгани мен каби хорижда яшайдиган ватандошларга қувонч ва ифтихор туйғуларини бағишлайди.
Шу жумладан, Малайзияда истиқомат қиладиган барча юртдошларимиз Ўзбекистон Республикаси Президентининг “Ватандошлар” жамоат фонди ташкил этилиши тўғрисида қарори қабул қилинганидан бениҳоя мамнун бўлди.
Мазкур фонд хорижий юртлардаги ватандошларимизни мамлакатимиздаги ислоҳотлар жараёнига кенг жалб қилишга катта туртки беради, деб ўйлайман. Бу барчамизни Ўзбекистонимиз тараққиёти йўлида янада жипслашишга ҳам кўмаклашади.
Хорижий элларда ўзбек тили ва адабиётини, маданий ва илмий меросимизни оммалаштириш янги ташкил этилган Фонднинг вазифалари сирасига кириши катта эътиборга сазовордир. Бу Ўзбекистоннинг илмий, маданий ва сайёҳлик салоҳиятини янада бойитиш ва кенг миқёсда тарғиб этиш нуқтаи назаридан қўшимча имкониятларни яратади.
