ТОШКЕНТ, 27 декабрь. /«Дунё» АА/. Ўзбекистоннинг Римдаги элчихонаси AIMART халқаро мусиқа ва санъат академияси (?талия) асосчиси ва директори Эдда Сильвестри ва унинг ҳамкасблари иштирокида «Нукус-Тошкент-Рим» телеконференциясини ташкил қилди, деб хабар бермоқда «Дунё» мухбири.
Тадбирда Қорақалпоғистон маданият вазири Қалбай Турдиев, Ўзбекистон маданият вазирининг ўринбосари Олимжон Мирзаев, Тошкент давлат консерваторияси ректори Камолиддин Ўринбоев ҳамда мусиқа соҳасидаги бошқа мутахассислар иштирок этди.
Қорақалпоғистонда бўлиб турган Ўзбекистоннинг ?талиядаги элчиси Отабек Акбаров тадбирни очар экан, Президент Шавкат Мирзиёев ташаббуси билан Нукусда опера санъати мактаб-интернатини яратиш лойиҳаси фаол амалга оширилаётганини таъкидлади. У мактаб биноси, унинг аудиториялари ва концерт зали, ўқувчиларнинг яшаш шароитлари билан танишишдан олган таассуротлари ҳақида сўзлаб берди. Мактабда малакали мутахассислар, жумладан, мусиқа ва санъат арбоблари дарс бериши кўзда тутилмоқда. Таълим муассасаси AIMART билан ҳамкорлик қилишга тайёр.
Қорақалпоғистон маданият вазири AIMART вакилларини республикани ижтимоий-иқтисодий ривожлантириш, унинг маданий меросини тиклаш ва асраб-авайлаш, ноёб бахшичилик санъатини халқаро майдонда ривожлантириш ва тарғиб қилиш, шунингдек, ёшларнинг унга қизиқишини ошириш ва умуман санъат соҳасида амалга оширилаётган ишлар билан таништирди.
У италиялик ҳамкасбларининг эътиборини ушбу ўқув муассасаси 150 ўқувчига мўлжаллангани, бу ерда 50 ўринли ётоқхона ва ошхона қурилгани, ўқув хоналари ўқув қуроллари ва мусиқа асбоблари билан жиҳозланганига қаратди. Кейинги ўқув йилида 10 нафар талаба опера йўналиши бўйича ва яна 10 нафари эса бахшичилик санъати бўйича танлов асосида қабул қилинади.
Тадбир доирасида Қорақалпоғистоннинг иқтидорли ёшлари иштирокида концерт дастури намойиш этилди. Қорақалпоғистонда хизмат кўрсатган артист Дарибай Хожабергенов, «Ниҳол» мукофоти лауреатлари Науризбек Махаммадияров, Акилбек Пиязов, давлат консерваторияси магистранти Сардарбек Азатов, давлат консерваторияси талабаси Хурсандбек Атамуратов ва Бахшичилик санъати ансамбли миллий ва жаҳон операси, бахшичилик санъати намуналарини ижро этди.
Концертдан сўнг AIMART академияси томонидан таклиф қилинаётган Нукус опера санъати мактаби концепциясининг муҳокамаси бўлиб ўтди.
Хусусан, Тошкент давлат консерваторияси ректори Камолиддин Ўринбоев ушбу таълим муассасаси ўқитувчилари ва талабалари учун ?талияда амалиёт ташкил этиш катта аҳамиятга эга эканини таъкидлади. Шунингдек, у италиялик ҳамкасбларининг эътиборини таклиф қилинган ўқув дастурини ҳар томонлама кўриб чиқиш ва италиялик ўқитувчилар иштирокидаги дарс соатларини кўпайтириш зарурлигига қаратди.
Опера ва бахшичилик санъат мактаб-интернати директори, Ўзбекистонда хизмат кўрсатган санъат арбоби Женисбек Пиязов таълим жараёнига италиялик мутахассисларни жалб қилиш учун қатор масалаларни, шу жумладан ташкилий ва молиявий масалаларни ҳал қилиш зарурлигини таъкидлади. У италиялик ҳамкасбларнинг мактаб-интернат билан яқиндан танишиш учун Ўзбекистонга ташрифини ташкил этиш ва ҳаракатлар режасини келишиб олиш тарафдори эканини билдирди.
Ўз навбатида, Эдда Сильвестри ўқув жараёнини нолдан бошлаб тўлиқ жараёнда ўтиш ва етук артистлар учун қайта тайёрлаш йўналишида ташкил этиш кераклигига эътибор қаратди. Шунингдек, ўқитувчилар учун малака ошириш курслари ташкил этилиши кутилмоқда.
Видеоконференцалоқа воситасида ташкил этилган анжуманда қатнашган таниқли дирижёр ва пианиночи Сержо Ла Стелла вокал маҳоратини ривожлантириш билан бир қаторда саҳнада ишлаш ва бадиий маҳоратни тарбиялаш масалаларига ҳам катта эътибор бериш кераклигини қўшимча қилди. Шу билан бирга, Сержо Ла Стелланинг дарсларида бошқа ўқитувчилар иштирок этиб, келажакда унинг методикасини ўз дарсларида қўллаши мумкин.
Таниқли италиялик опера ижрочиси (тенор) ва актёр Жанлука Терранова нафас олиш, ифода, артикуляция ва интонация бўйича ишлар ҳам жуда муҳимлигини таъкидлади. Унинг сўзларига кўра, вокал техникасини ўзлаштириш хонандадан катта жисмоний меҳнат ва ҳис-туйғуларни талаб қилади.
Онлайн-мулоқот якунида иштирокчилар 2021 йил январь ойининг биринчи ярмида видеоконференцалоқа форматидаги навбатдаги тадбирда Нукусда опера интернат-мактабини барпо этиш бўйича ўзаро ҳамкорликнинг ташкилий ва молиявий жиҳатларини батафсил муҳокама қилишга келишиб олди.
