СЕУЛ, 3 апрель. /“Дунё” АА/. Жорий йил 25 март - 1 апрель кунлари Алишер Навоий номидаги Ўзбекистон давлат академик катта театри жамоасининг Корея Республикасига гастроль сафари амалга оширилди, деб хабар бермоқда «Дунё» АА мухбири.
Аввал хабар берганимиздек, ушбу гастроль сафари Ўзбекистон Республикаси билан Корея Республикаси ўртасида дипломатик муносабатлар ўрнатилганининг 30 йиллигини кенг нишонлашга қаратилган тадбирлар доирасида, шунингдек, баҳор айёми Наврўз байрами муносабати билан ташкиллаштирилди.
Ҳафта давомида театр жамоаси Корея Республикасининг бир нечта ҳудудларида, хусусан Тегу, Пусан, Кочанг ва Гуми шаҳарларида концерт дастурларини намойиш этди ҳамда ушбу шаҳарлар раҳбарияти билан учрашувлар ўтказди.
Пёнтек шаҳрида бўлиб ўтган якуний концерт давомида ушбу шаҳар мэри Жунг Жан Сон томонидан Алишер Навоий номидаги Ўзбекистон давлат академик катта театри жамоасига миннатдорчилик билдирилиб, фахрий ёрлиқлар топширилди.
Қайд этиш керак, бугунги кунда давлатимиз томонидан санъат ва маданият ривожига улкан эътибор қаратилмоқда. Ушбу эътибор ва ғамхўрлик ўзбек опера санъатининг жаҳон миқёсида тобора кенгроқ эътироф этилишида муҳим омил бўлмоқда.
Алишер Навоий номидаги Ўзбекистон давлат академик катта театри жамоасининг Корея Республикасига амалга оширган илк йирик гастроль сафари мамлакатларимиз ўртасидаги маданий алоқаларни ривожлантиришга ҳисса қўшиши билан бир қаторда алоҳида стратегик шериклик алоқаларини янада мустаҳкамлашга ҳамда халқларимизнинг дўстлиги чуқурлаштиришга хизмат қилди.
Мазкур муҳим маданий тадбирни ташкиллаштиришда ҳар томонлама кўрсатилган амалий ёрдами учун Ўзбекистоннинг Жанубий Кореядаги элчиси Виталий Фенга Ўзбекистон Маданият вазирилигининг ташаккурномаси топширилди.
