ТОШКЕНТ, 16 декабрь. /«Дунё» АА/. «Ўзбеккино» миллий агентлигида россиялик маҳоратли продюсер, питчинг бўйича мутахассис Анна Гудкова томонидан ўқув семинари ташкил этилди, деб хабар бермоқда «Дунё» АА мухбири агентлик маълумотига таяниб.
Мазкур маҳорат дарсининг биринчи қисмида питчинг назарияси, тушунчаси, уни ўрганиш ва иштирок этиш учун аризаларни тўлдириш ҳақида маълумотлар берилди.
Семинарнинг иккинчи қисмида эса иштирокчилар ўзларининг креатив лойиҳаларини тўғри тақдим эта олиш бўйича амалий машғулотларда қатнашди.
— Ушбу семинарни ташкил этишда яқиндан ёрдам берган «Ўзбеккино» миллий агентлигига миннатдорлик билдираман, - деди А.Гудкова. - Ўзбекистонга келиб, ўзбек кино ижодкорлари ва соҳа мутахассислари билан бевосита танишиш имкониятига эга бўлганимдан мамнунман. Семинар давомида эса мамлакатингизда маҳоратли ёш киноижодкорлар етишиб чиқаётганига гувоҳ бўлдим.
Анна Гудкова – маҳоратли продюсер, Россиянинг фильм ишлаб чиқариш бўйича халқаро эксперти, киномуҳаррир. У 40 дан ортиқ қисқа метражли фильм ҳамда сериалларда креатив продюсер бўлиб ишлаган. Айни пайтда «Art pictures» кинокомпанияси бош муҳаррири лавозимида фаолият юритади.
