ПАР?Ж, 16 апрель. /«Дунё» АА/. Париж марказида жойлашган Франция радиосининг Фестиваллар залида (La Maison de la Radio) юртдошимиз, Страсбург филармония оркестри раҳбари Азиз Шоҳакимовнинг Франция Миллий оркестри иштирокидаги концерти намойиш этилди, деб хабар бермоқда «Дунё» АА мухбири.
Оркестр таркибидан скрипкачи, Франция Миллий оркестри солисти, турли мукофотлар совриндори Сара Немцану, шунингдек, машҳур француз пианиночиси Седрик Тибергиен жой олди. Оркестр П.Чайковскийнинг 4-симфонияси, Н.Римский–Корсаковнинг «?спанча каприччио»си ва француз композитори М.Равелнинг фортепиано учун концертини ижро этди.
Концерт дастурини мингдан зиёд мусиқа ихлосманди тинглади, шунингдек, у «France Musique» канали орқали жонли тарзда эфирга узатилди.
Тадбир ташкилотчилари Азиз Шоҳакимовни аудиторияга тақдим этиб, у Ўзбекистон фуқароси экани ва ёш истеъдодли дирижёр ҳозирги кунда бутун Европа бўйлаб мусиқа оламида шов-шувли муваффақиятларга эришаётганини таъкидлади. Шунингдек, Азиз Саксония давлат капелласи, Дюссельдорф симфоник оркестри, Бремен филармонияси оркестри, Германия Жануби-ғарбий радиоси оркестри, Франкфурт радиоси симфоник оркестри, Болоньядаги Комунале ва Венециядаги «Ла Фениче» театрлари филармоник оркестрлари, ?талия радиоси Миллий симфоник оркестри ва бошқа жамоалар билан ўзининг муваффақиятли дебютини ўтказгани урғуланди.
Азиз Шоҳакимов В.Успенский номидаги мусиқа мактабини тамомлаган. 13 ёшида у илк бор Ўзбекистон Миллий симфоник оркестри билан Бетховеннинг бешинчи симфонияси ва Ф.Листнинг фортепиано учун биринчи концертига, 14 ёшида эса Ўзбекистон давлат академик катта театрида «Кармен» операсига дирижёрлик қилган. 2001 йилда Ўзбекистон Миллий симфоник оркестрининг дирижёр ёрдамчиси этиб тайинланган, 2006 йилда эса ушбу жамоага раҳбарлик қила бошлаган. Шунингдек, у Текфен (Туркия) филармония оркестри мусиқий раҳбари ва Жузеппе Верди номидаги Милан (?талия) симфоник оркестрининг асосий таклиф этилган дирижёри ҳисобланади. 2021 йилдан бошлаб Страсбург филармония оркестрининг мусиқий директори сифатида фаолият юритиб келмоқда.
Франция радиоси уйи «Радио-Франс» давлат радиокорпорацияси бинолари мажмуасидир. У Франциядаги еттита энг йирик радиостанциялар, ўнлаб овоз ёзиш студиялари, офис хоналари, шунингдек, турли хил оммавий тадбирлар ўтказиладиган жойларни ўзида бирлаштирган.
Франция жамоатчилиги вакиллари юртдошимиз маҳорати ҳақида тўлқинланиб сўз юритди.
Хусусан, Реми Шерберг исмли томошабин ўзининг қуйидаги фикр-мулоҳазаларини баён қилди: «Ўзбекистонлик иқтидорли дирижёр иштирокидаги катта концертнинг гувоҳи бўлдик. Ёш маэстро куч-қувватга тўла. Унинг кутилмаган ҳаракатлари томошабинларни ҳайратга солди. Бугун биз мусиқа оламидаги яна бир ёрқин истеъдод соҳибини кашф этдик. Ўзбекистонда мумтоз мусиқа ривожига катта эътибор қаратилаётганига ҳам ишонч ҳосил қилдик. Ўзбек мусиқа мактаби дунёнинг етакчи оркестрларидан бирини бошқараётган таниқли дирижёрни тарбиялади, десам асло муболаға бўлмайди».
