ТОШКЕНТ, 17 июнь. /«Дунё» АА/."Ўзбеккино" Миллий агентлиги 2030 йилгача соҳани ривожлантириш концепциясининг жамоатчилик муҳокамаларини якунлади, деб хабар бермоқда “Дунё” АА мухбири.
Мамлакатимиз раҳбари Олий Мажлисга Мурожаатномасида кинематография соҳасида замонавий киноиндустрияни ривожлантириш, янги кинотеатрларни барпо этиш, юқори сифатли бадиий киноасарлар яратиш зарурлигини қайд этган эди.
«Жорий йилда давлат буюртмаси асосида кинематография маҳсулотларини ишлаб чиқариш тизими такомиллаштирилади. Шу муносабат билан 2030 йилгача кинематографияни ривожлантириш Концепцияси ҳамда “Кинематография тўғрисида”ги Қонунни ишлаб чиқиш зарур”, – дея таъкидлаган эди Президентимиз Шавкат Мирзиёев.
Ўтган вақт давомида концепция лойиҳаси юзасидан атрофлича ўрганишлар олиб борилди.
Бу галги муҳокамаларда таниқли режиссёрлар, кино ҳамда санъат арбоблари, ёш киноижодкорлар ва оммавий ахборот воситалари вакиллари иштирок этди.
Концепция лойиҳасида мамлакатимизда кино саноатининг 2030 йилгача бўлган истиқболлари қамраб олинган. Миллий кино бозори ва киношунослик мактабларини ривожлантириш, халқаро танловларда иштирок этиш салоҳиятига эга кинолар яратиш каби устувор йўналишлар шулар жумласидан.
Кўп сонли учрашув ва муҳокамалардан сўнг “2030 йилгача кино саноатини ривожлантириш концепцияси”нинг якуний лойиҳаси очиқ овоз бериш йўли билан қабул қилинди.
