ТОШКЕНТ, 28 июль. /«Дунё» АА/. "Ўзбеккино" миллий агентлиги хабарида келтирилишича, ?ккинчи жаҳон уруши пайтида Ўзбекистонда бўлган Япон ҳарбий асирлари ҳақида фильм суратга олинади, деб хабар бермоқда “Дунё” АА мухбири.
Мазкур фильмга Акбар Бектурдиев режиссёрлик қилади. Таъкидланишича, у тайёрлаган лойиҳа агентлик бадиий кенгаши томонидан иккинчи муҳокамада маъқулланган. Картина Япония элчихонаси билан ҳамкорликда суратга олинади.
Хабар қилинишича, фильм ҳақиқий воқеалар асосида тасвирга олинади. 1945 йил кузида совет ҳукумати буйруғи билан асирга тушган минглаб япон аскарлари мамлакатнинг чекка ҳудудларига, хусусан, 25 мингга яқини Ўзбекистонга юборилган. Улар Тошкент шаҳри ва вилоятларида кўплаб иншоотларни қуришда фаол иштирок этган.
Маълумки, япон ҳарбий асирлари Алишер Навоий номидаги Ўзбекистон Давлат академик катта театри биноси қурилишида ҳам қатнашган.
