ТОШКЕНТ, 12 февраль. /«Дунё» АА/. Коррупцияга қарши курашиш агентлиги раҳбарияти ҳамда Буюк Британия ва Шимолий ?рландия элчиси Тим Торлот ўртасида онлайн-мулоқот бўлиб ўтди, деб хабар бермоқда «Дунё» АА мухбири.
Агентлик маълум қилишича, учрашувда коррупцияга қарши курашишда ўзаро ҳамкорликни янада ривожлантириш, Буюк Британия ва Ўзбекистон ваколатли органлари ўртасида тажриба алмашиш, экспертлик кўмагини ташкил этиш каби масалалар муҳокама қилинди.
Мулоқотда Агентлик директори Акмал Бурханов мамлакатда коррупцияга қарши курашиш йўналишида амалга оширилаётган ислоҳотлар, миллий қонунчиликни такомиллаштириш ҳамда бунда Агентликнинг иштироки тўғрисида маълумот берди.
Элчи Тим Торлот Ўзбекистонда мазкур йўналишда қилинаётган ишларни эътироф этган ҳолда, Буюк Британиянинг бу бордаги тажрибаси ва тегишли идоралари фаолияти юзасидан маълумот берди.
Тим Торлот коррупцияга қарши курашишда фуқаролик жамияти институтлари фаоллигини ошириш, ОАВ вакиллари учун тажриба алмашиш мақсадида семинарлар ташкил этишга тайёр эканини билдирди.
Учрашув якуни бўйича томонлар ўртасида бир неча йўналиш ва соҳаларда ҳамкорликни йўлга қўйиш, Буюк Британиянинг коррупцияга қарши курашиш бўйича қонун ҳужжатлари билан бўлишиш ҳамда тегишли идоралар тажрибасини ўрганиш бўйича келишувга эришди.
