ТОШКЕНТ, 11 март. /«Дунё» АА/. Наврўз умумхалқ байрамини муносиб нишонлашга тайёргарлик кўриш, ўзаро меҳр-оқибат ва ҳамжиҳатликни янада кучайтириш, маҳаллалар, аҳоли турар жойларини ободонлаштириш ва кўкаламзорлаштириш мақсадида Ҳукумат фармойиши қабул қилинди, деб хабар бермоқда «Дунё» АА мухбири Адлия вазирлиги манбасига таяниб.
Фармойишга асосан, 2020 йил 14-15 март кунлари мамлакатимизнинг барча ҳудудларида «Обод юрт» умумхалқ ободонлаштириш ва кўкаламзорлаштириш хайрия ҳашари ўтказилади.
Ҳашар муносабати билан вазирликлар, идоралар ва бошқа ташкилотларда меҳнат қилаётган ходимларнинг ихтиёрий маблағлари ўз ташаббусларига кўра Ўзбекистон «Маҳалла» хайрия жамоат фондининг банкдаги ҳисоб варақларига ўтказилиши тавсия этилди.
Хайрия ҳашаридан тушган маблағларни кам таъминланган, боқувчисини йўқотган оилаларга, ижтимоий ҳимояга муҳтож кексаларга, ногиронлиги бўлган шахсларга, ёлғиз қарияларга, пенсионерларга моддий ва маънавий ёрдам кўрсатиш каби тадбирларга йўналтириш кўзда тутилган.
