ТОШКЕНТ, 23 февраль. /«Дунё» АА/. Халқаро рейтинглар ва индекслар билан ишлаш бўйича Республика кенгашининг видеоконференцалоқа тизими орқали навбатдаги йиғилиши ўтказилди, деб хабар бермоқда «Дунё» АА мухбири.
Парламент юқори палатаси маълумотига кўра, онлайн-йиғилишда Олий Мажлис Сенати Раиси, Республика кенгаши раиси Танзила Норбоева Кенгаш фаолиятининг 2020 йил якунлари тўғрисида маълумот берди.
Таъкидланишича, 2020 йилда мамлакатимиз учун устувор бўлган жами 13 та халқаро рейтингда Ўзбекистоннинг ўрни яхшиланганлиги, 3 та халқаро рейтингда илк маротаба қайд этилди.
Тадбирда мамлакатимизда халқаро ва маҳаллий экспертлар иштирокида 20 дан ортиқ турли семинарлар, учрашувлар ташкил этилганлиги ҳамда «II Халқаро рейтинглар форуми» ўтказилгани ва мамлакатимиз учун устувор бўлган рейтингларни ўзида мужассам этган «Ўзбекистон халқаро рейтингларда» ягона портали ишга туширилганлиги таъкидланди.
Йиғилишда ҳудудларнинг ҳуқуқ устуворлиги миллий индекси ишлаб чиқилганлиги, унга асосан эндиликда ҳудудларда ҳуқуқ устуворлиги ва қонунийликни таъминлаш, қабул қилинаётган қонун ҳужжатларининг ижросини ташкил этиш ҳолати ўрганилиши ҳамда жамоатчиликка эълон қилиб борилиши айтиб ўтилди.
Шу билан бирга, халқаро рейтингларда мамлакатимиз ўрни яхшиланган бўлса-да, уларнинг таркибий индикаторларидаги ўрнимиз пастлигича қолаётганлиги қайд этилиб, масъул вазирлик ва идоралар фоалияти танқидий баҳоланди.
Йиғилиш давомида Кенгаш ишчи органлари – молия вазири Темур ?шметов ва адлия вазири ўринбосари Худоёр Мелиев Ўзбекистоннинг ижтимоий-иқтисодий ва сиёсий-ҳуқуқий соҳаларга оид устувор халқаро рейтинг ва индекслардаги ўрнини яхшилаш бўйича 2021 йилга мўлжалланган чора-тадбирлар режалари лойиҳалари тўғрисида ахборот берди.
Хусусан, жорий йил давомида 7 та стратегия, 21 та қонун, 2 та концепция, 35 та норматив-ҳуқуқий ҳужжат лойиҳаларини ишлаб чиқиш кўзда тутилганлиги алоҳида таъкидлаб ўтилди.
Тадбир якунида Кенгаш ишчи органлари томонидан халқаро рейтингларга масъул вазирлик ва идораларнинг амалга ошираётган ишлари самарадорлигини ошириш бўйича қатор таклифлар билдирилди.
