КОБУЛ, 4 февраль /«Дунё» АА/. «The Daily Outlook Afghanistan» газетасида «Ўзбекистонда Геология фанлари университети ташкил этилмоқда» сарлавҳали мақола чоп этилди, деб хабар берди «Дунё»АА мухбири.
Унда Ўзбекистон Республикаси Президенти Шавкат Мирзиёев Тошкент шаҳридаги илмий-тадқиқот институтларида бўлиб, янги университет — Геология фанлари университети биноларини қуриш учун ғишт қўйди, дея қайд этилган.
Университет Давлат геология қўмитасининг тўртта институти —геология ва геофизика, гидрогеология ва муҳандислик геологияси, минерал ресурслар, геология ва нефть-газ конларини қидириш институтлари негизида ташкил этилмоқда.
Мазкур таълим муассасаси энг замонавий ускуналар билан жиҳозланади. Санкт-Петербург тоғ-кон университети ва дунёнинг бошқа нуфузли олий таълим масканлари ҳамда илмий марказлари билан ҳамкорликда ўқув дастурлари ишлаб чиқилади.
Нашр Ўзбекистон Республикаси Президенти Шавкат Мирзиёевнинг «Биз бугун шу соҳа ривожига асос бўладиган илм даргоҳига пойдевор қўймоқдамиз», деган сўзларидан иқтибос келтиради.
