ТАШКЕНТ, 21 декабрь. /«Дунё» АА/. Қозоғистонда коронавирусга қарши курашиш мақсадида 25 декабрдан 5 январгача карантин чекловлари жорий этилади, деб хабар бермоқда «Дунё» АА мухбири.
Қозоғистон Бош вазири Аскар Мамин раҳбарлигидаги ҳукумат комиссияси COVID-19 муносабати билан янги чеклов чораларини жорий этиш бўйича қарор қабул қилди.
«Келгуси йилнинг январь-февраль ойларида грипп касалликларининг кўпайиши натижасида коронавирус инфекциясига чалинганлар сони ошиши мумкин», деб хабар бермоқда ҳукумат расмий сайти.
Шу сабабли 25 декабрдан 5 январгача кўнгилочар томошалар, спорт ва оммавий маросимлар, шу жумладан Янги йил тадбирлари ва байрам тантаналарини ўтказишга таъқиқ жорий этилди.
Комиссия, шунингдек, COVID-19га қарши дори воситалари нархини 24 фоизгача арзонлаштириш бўйича ҳам қарор қабул қилган.
Хабар қилинишича, бугунги кунда Қозоғистон коронавирусга қарши ўзи ишлаб чиқарган «QazCovid-in» вакцинасининг учинчи босқич синовларини ўтказмоқда. Шунингдек, 22 декабрдан бошлаб Россия вакцинасини биргаликда ишлаб чиқаришга старт берилади.