ТОШКEНТ, 25 июль. / «Дунё» АА /. Қирғизистон Президенти Сооронбай Жеэнбеков бугун ушбу мамлака жамоатчилик телевидение ва радиоэшиттириш корпорациясининг «Биринчи радио»си мухбири саволига жавоб берар экан, Қирғизистонда COVID-19 қурбонларини хотирлаш мақсадида мамлакатда 30 июль кунини Миллий мотам куни деб эълон қилиш режалаштираётганини билдирди, деб хабар бермоқда «Дунё» АА мухбири.
“Мен бу ҳақда анчадан бери ўйлайман, - деб давлат раҳбарининг сўзларидан иқтибос келтирган «Кабар» миллий ахборот агентлиги. — Мен ушбу мавзуда олдиндан гапиришни хоҳламагандим, лекин гарчи бу ҳақда сўз юритиш бошланган экан, маълумот бериш зарур, деб биламан. Қурбон ҳайитини 31 июль куни нишонлаймиз. 30 июль куни эса мамлакатимизда Миллий мотам куни, деб эълон қилинади. Тегишли қарор чиқарилади”.
Қирғизистон Президенти коронавирус туфайли вафот этганларнинг оила аъзоларига яна бир бор чуқур ҳамдардлик изҳор этди.
“Ҳар бир Қирғизистон фуқаросининг машаққатлари ва тўлдириб бўлмайдиган йўқотишлари қалбимда акс этади. Яқинлари вафот этган барча ватандошларимга сабр-тоқат тилайман. Яратган Аллоҳ азиз Қирғизистонимизни асрасин”, - деди у.
25 июль ҳолатига кўра мамлакатда COVID-19 билан касалланган 32 минг 124 киши расман рўйхатга олинган. Улардан 19 минг 203 таси соғайган. 1 минг 249 бемор эса вафот этган.
