ТОШКЕНТ, 30 апрель. /“Дунё” АА/. Ўзбекистон Республикаси Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи, Республика бош давлат санитария инспектори Нурмат Отабеков «Ўзбекистон-24» телеканали орқали мамлакатимизда коронавирус билан боғлиқ ҳолат ҳақида маълум қилди, деб хабар бермоқда «Дунё» АА мухбири.
– Мамлакатимизда айни дақиқаларга келиб, коронавирус инфекцияси қайд этилган 2 минг 17 фуқаро рўйхатга олинган. Вирусология илмий-текшириш институтидан олинган маълумотга кўра, ушбу институт клиникасида даволанаётган 71 беморнинг 13 нафарида пневмония клиник белгилари кузатиляпти, 2 нафарининг аҳволи оғир, 1 нафарининг аҳволи ўта оғир. Эпидемиология-микробиология ва юқумли касалликлар илмий текшириш институтида даволанаётган 79 бемордан 2 нафарининг аҳволи оғир. Тошкент тиббиёт академияси кўп тармоқли клиникасида даволанаётган 89 бемордан 27 нафарида пневмония клиник белгилари бор, 3 нафарининг аҳволи оғир, деб баҳоланяпти.
Ҳурматли юртдошлар!
Касалликка чалинганларни даволашда эришилаётган ютуқлардан хабардорсиз. Айни пайтга келиб, 1 минг 96 нафар ҳамюртимиз касалликдан тўлиқ соғайиб, реабилитация марказларига ўтказилди, 897 нафар бемор шифохоналарда даволаш муолажаларини оляпти.
Куни кеча Президентимиз видеоселектр йиғилишида карантин тадбирларини бир мунча юмшатиш бўйича кўрсатмалар берди. Албатта, бу каби кўрсатмаларнинг берилиши ҳаммамиз учун қувонарли хабар.
Карантин ва чеклов тадбирлари нечоғлик самара берганини кўриб турибмиз. Биз айнан мана шу тадбирларга риоя қилганимиз сабабли касаллик авж олиб кетишининг олди олинди. Сиздан билдирилган ишончни суиистеъмол қилмасдан, мабодо кўчага чиққудек бўлсангиз, оралиқ масофани сақлашни, дока ниқоблар тақишни, ортиқча мулоқотлардан ўзингизни тийишингизни илтимос қиламиз. Яна бир муддат мана шу карантин тадбирларига риоя этиш орқали, албатта вазиятни барқарорлаштиришга эришамиз.
