ТОШКЕНТ, 25 январь. /«Дунё» АА/. «Ўзбекистон темир йўллари» АЖ маълумотига кўра, жорий йил 25 январидан бошлаб “Тошкент – Олот – Тошкент” йўналишида ҳафтасига тўрт маротаба йўловчи поездлари қатнови йўлга қўйилади, деб хабар бермоқда «Дунё» АА мухбири.
Ушбу ташаббус Ўзбекистон Президентининг 21-22 январь кунлари Бухоро вилоятига қилган ташрифи давомида Олотга йўловчи поездлар қатновини йўлга қўйиш бўйича берган таклифига биноан амалга оширилмоқда.
Унга кўра, ҳафтанинг душанба, сешанба, пайшанба ва жума кунлари “Тошкент – Олот” йўналишида, 26 январдан бошлаб эса ҳафтанинг сешанба, чоршанба, жума ва шанба кунлари “Олот – Тошкент” йўналишида йўловчи поездлар қатнови бошланади.
«Қўшимча маълумотни Тошкент шаҳридаги 1005 қисқа телефон рақами, жойлардаги темир йўл кассалари ҳамда маълумотлар бюросидан билиб олишингиз мумкин», дейилади «Ўзбекистон темир йўллари» АЖ хабарида.