ТОШКЕНТ, 14 июль. /«Дунё» АА/. Ўзбекистон Республикасининг Халқаро рейтинг ва индекслар билан ишлаш бўйича республика кенгашининг видеоконференцалоқа тарзида йиғилиши бўлиб ўтди, деб хабар бермоқда “Дунё” АА мухбир Олий Мажлис Сенати манбасига асосланиб.
Видеоконференцияни Ўзбекистон Республикаси Олий Мажлиси Сенати Раиси, Халқаро рейтинг ва индекслар билан ишлаш бўйича республика кенгаши раиси Танзила Нарбаева бошқарди.
Йиғилишда Кенгаш томонидан амалга оширилаётган ишлар, ижтимоий-иқтисодий ва сиёсий-ҳуқуқий соҳаларга оид устувор халқаро рейтинг ва индексларда Ўзбекистон Республикасининг ўрнини яхшилаш бўйича чора-тадбирлар режаларини тасдиқлаш, ?жтимоий-иқтисодий ва сиёсий-ҳуқуқий рейтинг ва индекслар билан ишлашга масъул вазирлик ва идоралар, маҳаллий давлат ҳокимияти органлари учун тренинглар ўтказиш тўғрисидаги масалалар муҳокама қилинди.
Қайд этилганидек, жорий йилнинг 3 июль куни БМТнинг саноатни ривожлантириш ташкилоти (UNIDO) томонидан чоп этилган “Рақобатбардош саноат унумдорлиги” индексининг 2020 йилги ҳисоботида мамлакатимиз илк маротаба акс эттирилиб, 152 та мамлакат орасида 92-ўринни, МДҲ таркибига кирувчи республикалар орасида 5-ўринни, Марказий Осиё мамлакатлари орасида 2-ўринни эгаллади.
Онлайн-тадбирда, шунингдек, Халқаро рейтинг ва индексдаги мамлакатимиз ўрнини яхшилаш кўп жиҳатдан қабул қилинган қонунларимизнинг жойлардаги ижроси билан боғлиқлиги таъкидланди. Бундан ташқари, бу жараёнда оммавий ахборот воситалари вакиллари, жумладан, журналист ва блогерлар билан ҳамкорлик қилиш зарурлиги қайд этилди.
Шу билан бирга, қабул қилинаётган қонун ҳужжатлари муайян тор доирадаги шахсларнинг манфаатига хизмат қилиши керак эмаслигига урғу берилди.
Кенгаш аъзолари томонидан ижтимоий-иқтисодий ва сиёсий-ҳуқуқий соҳаларга оид устувор халқаро рейтинг ва индексларда Ўзбекистон Республикасининг ўрнини яхшилаш бўйича чора-тадбирлар режалари лойиҳалари муҳокама қилиниб, тасдиқланди.
