ТОШКЕНТ, 14 март. /«Дунё» АА/. «Ўзбекнефтгаз» акционерлик жамияти делегацияси «Socar» компаниясининг (Озарбайжон) интеграцион корпоратив ахборот ресурси - «SAP ERP» тизимли дастури фаолиятини ўрганди, деб хабар бермоқда «Дунё» АА мухбири акционерлик жамияти ахборотига таяниб.
«Socar» компаниясида «SAP ERP» тизими 2008 йил жорий этила бошланган. Тизим 2010 йилда тўлиқ ишга тушган. «Ўзбекнефтгаз» АЖ тизим корхона ва заводларида ушбу модулларни қисқа, яъни бир йил ичида «Socar» компанияси билан ҳамкорликда амалда қўллашни ўз олдига мақсад қилиб қўйган.
Делегация вакиллари сафар давомида «Socar» компаниясида 2018 йилдан буён амалда қўлланиб келинган «SAP TR», «SAP CO», «SAP GRC», «SAP SL», «SAP PP» модуллари фаолияти ўрганди.
«Socar» компанияси раҳбарлари билан ўтказилган учрашувда икки компания ўртасидаги ҳамкорлик бўйича «Йўл харитаси» ишлаб чиқилди. Унга ўзаро тажриба алмашиш, ходимлар малакасини ошириш ва бошқа масалалар киритилди.
Шунингдек, «Рақамли кон» концепцияси ва рақамли технологияларни жорий этишда «Socar» компанияси тажрибасини қўллаш тўғрисида ҳам келишувга эришилди.
Ўзбекистон делегацияси «Aзнефть» ишлаб чиқариш бирлашмаси, «Биби-Эйбат» номли нефть ва газни қазиб олиш бўлимида ҳам бўлди. Мазкур компанияларда ўтказилган учрашувларда ўзаро ҳамкорлик қилиш, тажриба алмашиш бўйича келишувларга эришилди.
