АНҚАРА, 25 июнь. /“Дунё” АА/. «Ўзбекзаргарсаноати” уюшмаси Туркиянинг Маданият ва туризм вазирлиги ҳузуридаги Хориждаги турклар ва қардош жамиятлар бошқармаси ҳамда ?станбул Заргарлар палатаси билан онлайн музокаралар ўтказди, деб хабар бермоқда “Дунё” АА.
Ўзбекистон Республикасининг Туркиядаги элчихонаси кўмагида ташкил қилинган учрашувда “Ўзбекзаргарсаноати” уюшмаси вакилларининг заргарлик саноатида маркетинг, дизайн, иқтисодий таҳлил ва соҳага оид бошқа йўналишларда Туркия тажрибасини ўрганиш, ўзбекистонлик заргарларнинг ҳамкор мамлакатда малака ошириш курсларини ташкил этиш масалалари юзасидан фикр алмашилди.
Музокараларда қуйидаги йўналишларда лойиҳаларни ишлаб чиқиш ва амалга оширишга келишиб олинди:
– Туркиянинг ?станбул шаҳридаги “Алтинбаш” ва Анқарадаги “Гази” университетларида заргарлик ва дизайн йўналишларида ўзбекистонлик талабалар таълимини қўллаб-қувватлаш;
– Ўзбекистондан 20-30 нафар заргарнинг Туркия Заргарлик палаталарида малака ошириш курсларини ташкил қилиш;
– Туркиянинг заргарлик тармоғида етакчи профессор-ўқитувчиларининг “Ўзбекзаргарсаноати” уюшмаси вакиллари учун маҳорат дарсларини йўлга қўйиш.
Айтиб ўтиш жоиз, сўнгги йилларда Туркияда заргарлик тармоғи жадал ривожланмоқда ва экспортбоп маҳсулотлар ишлаб чиқаришда катта тажрибага эга. 2020 йилнинг февраль ойи ҳолатига кўра, мамлакатда 47 минг заргар рўйхатдан ўтган.
Тармоқнинг мамлакат экспортидаги улуши ҳам мунтазам ортиб бормоқда. Туркияда 250 минг киши заргарликда доимий иш билан банд.
