ТОШКЕНТ, 4 июнь. /«Дунё» АА/. Ўзбекистонда Энергетика вазирлиги томонидан халқаро экспертларни жалб қилган ҳолда паст углеродли ривожланиш миллий стратегияси ишлаб чиқилмоқда, деб хабар бермоқда «Дунё» АА мухбири вазирлик манбасига асосланиб.
Жорий йил май ойининг бошида Ўзбекистонда Осиё тараққиёт банки ва Жаҳон банки иштирокида мамлакатни 2030 йилга қадар электр энергияси билан таъминлаш Концепцияси қабул қилинган эди. Мазкур ҳужжат мавжуд электр станцияларни модернизация қилиш, қайта тикланувчи энергия манбалари ва атом электр станциялари ҳисобига электрогенерациянинг янги турларини яратишни назарда тутади. Бу чора-тадбирлар 2030 йилга келиб иссиқлик газларининг атроф-муҳитга ажралишини 2010 йилга нисбатан 10 фоизга қисқартириш имконини беради.
Ҳозирги кунда ушбу концепция асосида Ўзбекистонда кам углеродли миллий энергетика стратегияси ишлаб чиқилмоқда. Стратегияни тайёрлаш жараёнига Европа тикланиш ва тараққиёт банки экспертлари жалб этилган.
– Кам углеродли энергетикага ўтиш стратегияси мамлакат энергетика тизимини моделлаштириш усуллари ва истиқболга мўлжалланган тараққиётнинг тахминий сценарийлари ёрдамида ишлаб чиқилмоқда. Бу билан Corporate Solutions халқаро консалтинг компанияси шуғулланмоқда, — дея таъкидлади Ўзбекистон энергетика вазири Алишер Султонов. - Шу билан бир вақтда биз Германия, ?спания, Япония тажрибасини ўрганаяпмиз. Бироқ, бу мамлакатлар тажрибасини Ўзбекистон шароитида тўлиқ равишда қўллаш мумкин эмаслигини ҳам эътиборда олиш лозим. Ўзбекистон учун халқаро тажрибадан максимал равишда фойдаланган ҳолда ривожланишнинг индивидуал режаси танланади.
Режага кўра, 2030 йилга келиб Ўзбекистонда умумий қуввати 3 ГВт бўлган шамол электростанциялари, қуввати 5 ГВт бўлган қуёш электростанциялари, шунингдек, қуввати 2,4 ГВт бўлган атом электр станцияси қурилиши белгиланган.
