“Dunyo” AA/. Misrda amaliy tashrif bilan bo‘lib turgan O‘zbekiston innovatsion rivojlanish vaziri Ibrohim Abdurahmonov kecha Qohirada o‘tkazilgan Jahon paxta tadqiqotlari konferensiyasining (World Cotton Research Conference) yopilish marosimida ishtirok etdi, deb xabar bermoqda “Dunyo” AA muxbiri.
Tadbir doirasida bo‘lib o‘tgan nufuzli olimlar va mutaxassislarni taqdirlash marosimida O‘zbekiston vakiliga Xalqaro paxta maslahat qo‘mitasi (ICAC) va Xalqaro paxta tadqiqotchilari assotsiatsiyasi (ICRA) tomonidan tashkilotlar faoliyatining rivojlanishida ko‘rsatayotgan xizmatlari uchun esdalik mukofot topshirildi.
Jahon paxta tadqiqotlari konferensiyasining yopilish marosimida O‘zbekiston innovatsion rivojlanish vaziri mamlakatimizda amalga oshrilayotgan islohotlar va ularning natijalari, shuningdek, Jahon paxta tadqiqotlari konferensiyasini O‘zbekistonda o‘tkazish imkoniyatlari yuzasidan taqdimot o‘tkazdi.
Ibrohim Abdurahmonov, shuningdek, ommaviy axborot vositalari vakillariga O‘zbekistonda paxtachilik sohasida amalga oshirilayotgan ishlar, sohadagi yutuqlar va Misr bilan aloqalarni rivojlantirish imkoniyatlari to‘g‘risida intervyu berdi. Unda vazir tashrif davomida erishilgan kelishuvlar va ularni amalga oshirish bo‘yicha tuzilgan rejalar haqida so‘zlab berdi.
