КУАЛА-ЛУМПУР, 11 август. /«Дунё» АА/. Ўзбекистоннинг Малайзиядаги элчихонаси «Consumption Union» компанияси билан биргаликда Куала-Лумпур шаҳрида Ўзбекистоннинг инвестиция ва экспорт салоҳияти ҳамда унинг бизнес имиджини тарғиб қилиш, Малайзия компанияларини ҳамкорликка жалб қилиш мақсадида бизнес-форум ўтказди, деб хабар бермоқда «Дунё» ахборот агентлиги мухбири.
2010 йилда ташкил этилган «Consumption Union» компанияси Жануби-шарқий Осиё мамлакатларида электрон тижоратни ривожлантириш учун махсус электрон платформаларни ишлаб чиқиш билан шуғулланади. Компания томонидан ишлаб чиқилган онлайн-платформа 10 миллиондан ортиқ обуначига эга. Компания шунингдек, онлайн-банкинг дастурини ишлаб чиқади.
Бизнес-форумда 200 га яқин Малайзиянинг давлат идоралари, саноат ва савдо компаниялари, шу жумладан Халқаро савдо ва саноат вазирлиги, Ташқи савдони ривожлантириш корпорацияси, Малайзиянинг инвестицияларни ривожлантириш бошқармаси, Малайзия стандартлари департаменти раҳбарлари иштирок этди.
«Consumption Union» компанияси директори Тен Йи Лим ўз нутқида Ўзбекистон Президентининг тадбиркорликни қўллаб-қувватлаш, кичик ва хусусий бизнес учун кенг имкониятлар яратиш, янги иш ўринлари ташкил қилиш, экспорт салоҳиятини мустаҳкамлаш ва Ўзбекистон халқининг турмуш фаровонлигини янада ошириш борасидаги сиёсатини юқори баҳолади.
У Ўзбекистон билан ҳамкорликни янада мустаҳкамлашдан, хусусан, компания учун электрон савдо майдончасини жорий этиш орқали маҳаллий экспортчиларга ўз маҳсулотларини Жануби-шарқий Осиёдаги истеъмолчиларга сотиш имкониятини очиб беришдан манфаатдор эканини билдирди.
Тадбир натижасида тегишли мутахассисларни жалб қилган ҳолда электрон тижоратни ривожлантириш соҳасида Ўзбекистон компаниялари учун уч кунлик вебинар ташкил этиш тўғрисида келишувга эришилди.
Шунингдек, икки мамлакат ишбилармон доиралари ўртасида савдо-иқтисодий ва сармоявий ҳамкорликни ривожлантириш истиқболларини муҳокама қилиш учун В2В шаклидаги қўшма бизнес-форум ўтказиш, республиканинг тегишли вазирлик ва идоралари раҳбарлари билан учрашувлар, шунингдек, эпидемиологик вазият яхшилангандан сўнг Малайзия ишбилармон доиралари вакилларининг Ўзбекистонга ташрифини ташкил этишга қарор қилинди.
