КУАЛА-ЛУМПУР, 11 июнь. /«Дунё» АА/. Ўзбекистоннинг Малайзиядаги элчихонаси кўмагида «Халқ банки» акциядорлик тижорат банки (АТБ) ва ҳамкор мамлакатнинг Эксимбанки раҳбарлари иштирокида видеоконференция шаклида музокаралар ўтказилди, деб хабар бермоқда «Дунё» АА мухбири.
Мулоқот давомида Ўзбекистонда Малайзия банки иштирокида инвестиция лойиҳаларини амалга ошириш масалалари муҳокама қилинди.
Ҳамкор томон Малайзия компаниялари иштирокидаги «Халқ банки» АТБ ва мамлакатимизнинг бошқа молия муассасалари билан инвестиция ҳамда экспортни ривожлантиришга қаратилган лойиҳаларни молиялаштиришда шерикликка тайёр эканини таъкидлади.
Музокараларда Эксимбанк билан «Халқ банки» АТБ ўртасида ўзаро ҳамкорлик бўйича ҳужжатларни имзолаш, шунингдек, жаҳонда эпидемиологик вазият барқарорлашганидан сўнг малайзиялик мутахассисларнинг юртимизга ташрифини ташкил қилишга келишиб олинди.
Эслатиб ўтамиз, Экимбанкнинг асосий йўналиши экспорт ва импорт маҳсулотлари ишлаб чиқарувчиларни қўллаб-қувватлаш, хизматлар, шунингдек, истиқболли инвестиция лойиҳаларини молиялаштириш учун кредит линияларини тақдим этишга қаратилган.
Бундан ташқари банк экспорт кредитлари, экспортни молиялаштириш ва хорижий инвестициялар бўйича суғурта хизматларини тақдим этади.
